విదేశీ విద్యార్థులకు 25% అదనపు సీట్లు

విశ్వవిద్యాలయాలకు UGC మార్గదర్శకాలు

న్యూఢిల్లీ, సెప్టెంబర్ 30: దేశవ్యాప్తంగా ఉన్న ఉన్నత విద్యా సంస్థల్లో (హెచ్‌ఈఐ) విదేశీ విద్యార్థులకు 25 శాతం సూపర్‌న్యూమరీ సీట్లను కేటాయించేందుకు యూనివర్సిటీ గ్రాంట్స్ కమిషన్ (యూజీసీ) శుక్రవారం అనుమతి ఇచ్చింది. ఈ మేరకు పలు మార్గదర్శకాలను విడుదల చేసింది. దీనికి సంబంధించి డ్రాఫ్ట్ నోటిఫికేషన్‌ను గత నెలలో ప్రజల సమీక్షకు అందుబాటులో ఉంచారు. అంతేకాకుండా విదేశీ విద్యార్థుల అడ్మిషన్ ప్రక్రియ పారదర్శకంగా ఉండేలా యూనివర్సిటీలు జాగ్రత్తలు తీసుకోవాలని యూజీసీ తాజా మార్గదర్శకాల్లో స్పష్టం చేసింది.

“సంబంధిత HEIలు మార్గదర్శకాల ప్రకారం మౌలిక సదుపాయాలు మరియు సిబ్బంది వంటి అవసరాలను దృష్టిలో ఉంచుకుని ఈ 25 శాతం సీట్లను సృష్టించాలి. విదేశీ విద్యార్థులకు వారి అర్హతల ఆధారంగా సీట్లు కేటాయించాలి. వారి అర్హతను యూజీసీ లేదా మరేదైనా యూజీసీ గుర్తింపు పొందిన సంస్థ నిర్ణయిస్తుంది’’ అని యూజీసీ స్పష్టం చేసింది. యూజీసీ చైర్మన్ జగదీశ్ కుమార్ మాట్లాడుతూ.. అడ్మిషన్ల విషయంలో తమ సొంత విధానాలను ఎంచుకునే స్వేచ్ఛను యూనివర్సిటీలకు ఇచ్చామని చెప్పారు. విదేశీ విద్యార్థులకు ఎలాంటి ప్రవేశ పరీక్షలను యుజిసి నిర్ణయించలేదని ఆయన వివరించారు. అంతేకాకుండా, అంతర్జాతీయ విద్యార్థుల మార్పిడి మరియు అంతర్జాతీయ విశ్వవిద్యాలయాలతో ఒప్పందాలు (MOU) ఈ 25 శాతం సీట్ల కోటా పరిధిలోకి రావని UGC మార్గదర్శకాలు స్పష్టం చేశాయి. అండర్ గ్రాడ్యుయేట్, పోస్ట్ గ్రాడ్యుయేట్ కోర్సుల్లో ఈ సీట్లను కేటాయించాలని, పీహెచ్ డీ సీట్లకు సంబంధించి యూజీసీ ఎప్పటికప్పుడు జారీ చేసే నిబంధనలను పాటించాలని సూచించింది. 25 శాతం కోటాలో మిగిలిన సీట్లను అంతర్జాతీయ విద్యార్థులకు మినహా మరెవరికీ కేటాయించకూడదని నిర్ణయించారు. అన్ని ఉన్నత విద్యా సంస్థల్లో అంతర్జాతీయ విద్యార్థి కార్యాలయాన్ని ఏర్పాటు చేయాలని, విద్యార్థులకు సంబంధించిన అన్ని వివరాలను ఈ కార్యాలయం నిర్వహించాలని యూజీసీ వివరించింది.

నవీకరించబడిన తేదీ – 2022-10-01T18:29:46+05:30 IST