చెన్నై: పచ్చని పంట పొలాలు ధ్వంసమయ్యాయి.

చెన్నై, (ఆంధ్రజ్యోతి): రెండో టన్నెల్‌ విస్తరణ పనుల్లో భాగంగా కడలూరు జిల్లా నైవేలిలోని ఎన్‌ఎల్‌సీ కంపెనీ బుధవారం ఉదయం పచ్చని పొలాల్లో ఎక్స్‌కవేటర్లను నడిపి కాలువ తవ్వకాన్ని ప్రారంభించారు. కోతకు నోచుకోని వరి పంటల మధ్యలోనే యంత్రాలను నడిపి కాల్వలు తవ్వడంపై రైతులు ఆగ్రహం వ్యక్తం చేశారు. అయితే కట్టుదిట్టమైన పోలీసు బందోబస్తు మధ్య కాలువ పనులు చేపట్టడంతో అధికారులు రైతులను పొలాల్లోకి కూడా అనుమతించలేదు. తమ కళ్ల ముందే పండిన పంటలపై యంత్రాలు నడుస్తున్నాయని రైతులు ఎన్‌ఎల్‌సీ అధికారులకు వ్యతిరేకంగా నినాదాలు చేశారు. భూగర్భ బొగ్గు తవ్వకాల కోసం రెండో టన్నెల్‌ తవ్వేందుకు ఎన్‌ఎల్‌సీ కంపెనీ పనులు చేపట్టింది. ఈ మేరకు బుధవారం ఉదయం కట్టాలాయి, కరివెట్టి, మేల్వలయమాదేవి, కీల్వలయమాదేవి, అతనూరు తదితర ప్రాంతాల్లోని వ్యవసాయ భూముల్లో సేథియాతోపు సమీనం తవ్వకాలు చేపట్టారు. 20కి పైగా యంత్రాలతో ఎన్ ఎల్ సీ అధికారులు పచ్చని పొలాల మధ్య నడిపి కాల్వలు తవ్వడం ప్రారంభించారు. ఈ ప్రాంతాల్లో సుమారు 1500 మీటర్ల మేర కాల్వ తవ్వాల్సి ఉండగా.. బుధవారం ఉదయం రైతుల నిరసనల మధ్య శరవేగంగా పనులు చేపట్టి 450 మీటర్ల పొడవునా కాల్వ తవ్వకం పనులు పూర్తి చేశారు. పంటలు పండిన తర్వాతే కాలువ పూడికతీత పనులు చేపట్టాలని, ఎన్ ఎల్ సీ టన్నెల్ విస్తరణ భూసేకరణ పథకంలో తగిన పరిహారం చెల్లించాలని గతంలో రైతులు చెప్పినా అధికారులు పట్టించుకోలేదని తెలుస్తోంది.

కాల్వ పనులను రైతులు అడ్డుకునే అవకాశం ఉందని భావించిన ఎన్‌ఎల్‌సీ అధికారులు ఆ పొలాల వద్ద మంగళవారం రాత్రి డీఎస్పీ రాజారాం నేతృత్వంలో 600 మంది పోలీసులతో బందోబస్తు ఏర్పాటు చేశారు. వలయమాదేవి నుంచి సెట్టియాతోపు ప్రాంతం వరకు పంట పొలాల కంచెల వద్ద పోలీసులు లాఠీలు, తుపాకులు పట్టుకుని నిలువడంతో ఆ ప్రాంతంలో ఉద్రిక్త వాతావరణం నెలకొంది. వజ్ర వాహనం, అగ్నిమాపక యంత్రం, అంబులెన్స్ వంటి పోలీసు రక్షణ వాహనాలు కూడా పెద్దఎత్తున నిలిపి ఉంచారు. తమ పొలాల్లో కాలువ తవ్వకాలు జరుగుతున్నాయని తెలుసుకున్న రైతులు పెద్ద ఎత్తున తరలివచ్చారు. ఈ సందర్భంగా రైతులు మాట్లాడుతూ… ఎన్ ఎల్ సీ తవ్వకాలకు భూమి ఇచ్చేందుకు అందరం అంగీకరించామని, భూసేకరణకు తగిన పరిహారం చెల్లించలేదని, సరైన పద్ధతిలో నగదు చెల్లించకుండా ఇబ్బందులకు గురిచేస్తున్నారని వాపోయారు. ఈ విషయమై ఎన్‌ఎల్‌సీ అధికారులు మాట్లాడుతూ… జూన్‌లోనే భూసేకరణకు సంబంధించి అధికారిక ప్రకటన వెలువడి, కేటాయించిన వారికి సక్రమంగా పరిహారం చెల్లించాం. ఈ సందర్భంగా సరిపడా పరిహారం రాని రైతులంతా ఎన్ ఎల్ సి అధికారులపై ఆగ్రహం వ్యక్తం చేశారు.

నవీకరించబడిన తేదీ – 2023-07-27T08:55:20+05:30 IST