– కలబురగిలో ప్రారంభించనున్న సీఎం
– విద్యుత్ శాఖ మంత్రి కేజే జార్జ్ వెల్లడించారు
బెంగళూరు, (ఆంధ్రజ్యోతి): రాష్ట్ర ప్రభుత్వ హామీ పథకాల్లో ఒకటైన గృహజ్యోతిని ముఖ్యమంత్రి సిద్ధరామయ్య ఈ నెల 5న కలబురగిలోని ఎన్‌బీ మైదానంలో లాంఛనంగా ప్రారంభించనున్నారు. మంగళవారం బెంగళూరులో విద్యుత్ శాఖ మంత్రి కేజే జార్జ్ మీడియాతో మాట్లాడుతూ బెస్కామ్ ఆధ్వర్యంలో ఉచిత విద్యుత్ బిల్లుల పంపిణీ ప్రారంభించామన్నారు. ఆగస్టు నెల నుంచి ఈ పథకాన్ని అమలు చేస్తున్నామని, దీని ద్వారా మొత్తం 1.42 కోట్ల కుటుంబాలు లబ్ధి పొందుతాయన్నారు. ఈ చారిత్రాత్మక కార్యక్రమంలో ఏఐసీసీ అధ్యక్షుడు మల్లికార్జున ఖర్గే, ఉప ముఖ్యమంత్రి డీకే శివకుమార్, ఐటీ బీటీ మంత్రి ప్రియాంక ఖర్గే, మంత్రులు, ఎమ్మెల్యేలు పెద్ద సంఖ్యలో పాల్గొంటారని తెలిపారు. ఈ పథకం మధ్యతరగతి కుటుంబాలకు వరంగా మారుతుందన్నారు. 200 యూనిట్ల వరకు ఉచిత విద్యుత్తు సరఫరా ఉంటుందని తెలిపారు. జులై 27లోపు గృహజ్యోతి కోసం దరఖాస్తు చేసుకున్న వారందరికీ ప్రస్తుత నెలలో బిల్లులో రాయితీ లభిస్తుందని తెలిపారు. జూలై 27 తర్వాత దరఖాస్తు చేసుకున్న వారికి సెప్టెంబర్‌లో ప్రయోజనం ఉంటుంది. గృహజ్యోతి, భాగ్యజ్యోతి, కుటీర జ్యోతి, అమృత జ్యోతి అన్ని పథకాలను ఒకే గొడుగు కిందకు తీసుకొచ్చామని, ఈ పథకం ద్వారా మొత్తం 2.14 కోట్ల మందికి లబ్ధి చేకూరుతుందని చెప్పారు. 200 యూనిట్ల కంటే ఎక్కువ విద్యుత్ వినియోగించే వారు పూర్తి బిల్లు చెల్లించాల్సి ఉంటుంది. ఈ పథకంపై సందేహాలు ఉన్నవారు మరియు దరఖాస్తు చేసుకోవాలనుకునే వారు బెస్కామ్‌తో సహా అన్ని విద్యుత్ కార్యాలయాలను సందర్శించవచ్చు. ఉచిత విద్యుత్ పథకం ద్వారా ప్రభుత్వంపై పడే భారాన్ని వృథా ఖర్చులను తగ్గించి సర్దుబాటు చేస్తామని మరో ప్రశ్నకు బదులిచ్చారు. మీడియా సమావేశంలో విద్యుత్ శాఖ అడిషనల్ చీఫ్ సెక్రటరీ గౌరవ్ గుప్తా, కేపీటీసీఎల్ ఇంచార్జి ఎండీ పంజాక్ కుమార్ పాండే, బెస్కామ్ ఎండీ మహంతేశ్ బేలగి తదితరులు పాల్గొన్నారు.
కొత్త విద్యుత్ పాలసీ రూపకల్పన
విద్యుత్ ఉత్పత్తి ఖర్చును గణనీయంగా తగ్గించి తక్కువ ధరకే వినియోగదారులకు అందుబాటులోకి తెచ్చేందుకు కొత్త విధానాన్ని రూపొందిస్తున్నట్లు మంత్రి కేజే జార్జ్ ప్రకటించారు. మంగళవారం నగరంలో ఆయన మీడియాతో మాట్లాడుతూ సంప్రదాయేతర ఇంధన వనరుల ఉత్పత్తిని పెంచడం ద్వారా ఇది సాధ్యమవుతుందని నిపుణుల నివేదికలు చెబుతున్నాయన్నారు. సోలార్ పవర్, విండ్ పవర్, గ్రీన్ హైడ్రోజన్ ద్వారా విద్యుత్ ఉత్పత్తిని పెంచేందుకు రాష్ట్రంలో గణనీయమైన అవకాశాలున్నాయన్నారు. ఇందుకోసం ప్రత్యేక మాస్టర్‌ప్లాన్‌ రూపొందించాలని అధికారులను ఆదేశించినట్లు తెలిపారు. సోలార్ పవర్ కోసం భూమిని కౌలుకు ఇచ్చేందుకు రైతులు ఉత్సాహంగా ముందుకు వస్తున్నారు. అలాంటి వారిని ప్రభుత్వం అన్ని విధాలుగా ప్రోత్సహిస్తుందని తెలిపారు.
నవీకరించబడిన తేదీ – 2023-08-02T11:48:32+05:30 IST
