దేశ రాజధాని ఢిల్లీలో సంచలనం సృష్టించిన మైనర్ బాలికపై అత్యాచారం కేసులో నిందితుడైన ఢిల్లీ ప్రభుత్వ అధికారిని ఢిల్లీ పోలీసులు సోమవారం అరెస్టు చేశారు. ఢిల్లీ ప్రభుత్వ మహిళా శిశు అభివృద్ధి శాఖలో డిప్యూటీ డైరెక్టర్‌గా పనిచేస్తున్న ప్రమోదయ్‌తో పాటు అతనికి సహకరించిన వ్యక్తిని పోలీసులు అదుపులోకి తీసుకున్నారు.
న్యూఢిల్లీ: దేశ రాజధాని ఢిల్లీలో సంచలనం సృష్టించిన మైనర్ బాలికపై అత్యాచారం కేసులో నిందితుడిగా ఉన్న ఢిల్లీ ప్రభుత్వ అధికారి ప్రమోదయ్ ఖాఖాను ఢిల్లీ పోలీసులు సోమవారం అదుపులోకి తీసుకున్నారు. ఢిల్లీ ప్రభుత్వ మహిళా శిశు అభివృద్ధి శాఖలో డిప్యూటీ డైరెక్టర్‌గా పనిచేస్తున్న ప్రమోదయ్‌తో పాటు అతనికి సహకరించిన వ్యక్తిని పోలీసులు అదుపులోకి తీసుకున్నారు. ప్రస్తుతం వీరిద్దరిని సురక్షిత ప్రాంతంలో విచారిస్తున్నట్లు ఉత్తర ఢిల్లీ డీసీపీ సాగర్ సింగ్ కల్సి తెలిపారు. గత కొన్ని నెలలుగా బాలికపై ప్రమోదయ్ అత్యాచారానికి పాల్పడినట్లు ఆరోపణలు ఎదుర్కొంటుండగా, బాలిక గర్భం దాల్చినప్పుడు అబార్షన్ చేయించుకోవడానికి సహకరించిందన్న ఆరోపణలను అతని భార్య ఎదుర్కొంటోంది.
మేజిస్ట్రేట్ ఎదుట బాధితురాలు ఇచ్చిన వాంగ్మూలం మేరకు నిందితులపై సీఆర్పీఎఫ్ సెక్షన్ 164 కింద కేసు నమోదు చేసి, ఈరోజు సాయంత్రం అరెస్ట్ చేసే అవకాశం ఉన్నట్లు సమాచారం. బాధితురాలి తల్లి ఇచ్చిన వాంగ్మూలాన్ని CrPC సెక్షన్ 161 కింద నమోదు చేశారు.
బాధితురాలి తండ్రి అక్టోబర్ 1, 2020న చనిపోయాడు. దాంతో అతని స్నేహితుడు ప్రమోదయ్ అమ్మాయిని చూసుకుంటానని చెప్పి తన ఇంటికి తీసుకెళ్లాడు. నవంబర్ 2020 నుంచి జనవరి 2021 మధ్యలో ఆమెపై పలుమార్లు అత్యాచారం చేశాడని.. ఈ విషయం తెలిసి అతని భార్య కూడా సహకరించిందని పోలీసులు చెబుతున్నారు. బాలికను కొట్టడమే కాకుండా గర్భనిరోధక మాత్రలు ఇచ్చి బలవంతంగా అబార్షన్ చేయించారు. బాధితురాలి ఫిర్యాదు మేరకు వీరిద్దరిపై పోక్సో చట్టంలోని పలు సెక్షన్ల కింద కేసు నమోదు చేశారు. ఇటీవల అస్వస్థతకు గురై స్థానిక ఆస్పత్రిలో చేరిన బాధితురాలు తనకు గతంలో జరిగిన దారుణాన్ని అక్కడి కౌన్సిలర్‌కు వివరించడంతో విషయం వెలుగులోకి వచ్చింది. ప్రమోదయ్‌ను ఉద్యోగం నుంచి సస్పెండ్ చేస్తూ సీఎం కేజ్రీవాల్ సోమవారం ఉత్తర్వులు జారీ చేశారు.
నవీకరించబడిన తేదీ – 2023-08-21T16:26:41+05:30 IST
