నాలుగు రోజుల క్రితం అటవీశాఖ అధికారులు అమర్చిన ట్రాప్ కెమెరాల్లో మరో చిరుతపులి కనిపించింది. దీన్ని పట్టుకునేందుకు పలు ప్రాంతాల్లో బోనులు ఏర్పాటు చేశారు.
చిరుతపులి చిక్కుకుంది
చిరుత చిక్కు: తిరుమలలో మరో చిరుత చిక్కుకుంది. తిరుమల కొండపైకి వెళ్లే కాలిబాటపై నరసింహస్వామి దేవాలయం 7వ మైలు సమీపంలో అటవీశాఖ అధికారులు వేసిన బోనులో చిరుత చిక్కుకుంది. తిరుమల నడకదారిలో రెండు నెలల వ్యవధిలో ఇప్పటికే నాలుగు చిరుతలను అధికారులు పట్టుకున్నారు. గురువారం ఉదయం అధికారులు ఏర్పాటు చేసిన బోనులో ఐదో చిరుత కూరుకుపోయింది. నడకదారిలో టీటీడీ, అటవీశాఖ అధికారులు ట్రాప్ కెమెరాలను ఏర్పాటు చేశారు. నాలుగు రోజుల క్రితం ట్రాప్ కెమెరాలో చిరుత సంచారాన్ని గమనించిన అధికారులు దానిని బంధించేందుకు బోనులను ఏర్పాటు చేశారు. నరసింహస్వామి ఆలయంలో ఏర్పాటు చేసిన బోనులో చిరుత చిక్కుకుంది. దీంతో అధికారులు, భక్తులు ఊపిరి పీల్చుకున్నారు.
నెల్లూరు జిల్లాకు చెందిన ఆరేళ్ల బాలిక గత నెలలో తిరుమల కొండకు కాలినడకన వెళ్తుండగా అలిపిరి వద్ద చిరుత దాడి చేసి చంపిన సంగతి తెలిసిందే. దీంతో అప్రమత్తమైన అధికారులు తిరుమల కొండల్లో పలుచోట్ల బోనులు ఏర్పాటు చేశారు. దీంతో పాటు నడకదారిపై గట్టి బందోబస్తు ఏర్పాటు చేశారు. గత నెలలోనే అటవీశాఖ అధికారులు ఏర్పాటు చేసిన బోనుల్లో మూడు చిరుతలు పట్టుబడ్డాయి. చిరుతల భయం పోయిందని భావించారు. నాలుగు రోజుల క్రితం అటవీశాఖ అధికారులు అమర్చిన ట్రాప్ కెమెరాల్లో మరో చిరుతపులి కనిపించింది. దీంతో భక్తులు తీవ్ర భయాందోళనకు గురయ్యారు. అయితే గురువారం తెల్లవారు జామున అధికారులు ఏర్పాటు చేసిన బోనులో చిరుత చిక్కుకుంది. ఇదిలావుంటే, గత నెలలో బాలిక మృతి చెందడంతో నడకదారిలో భక్తుల రద్దీ తగ్గింది.
తిరుమల నడకదారిలో భక్తులకు టీటీడీ అధికారులు చేతి కర్రలు అందజేశారు. బుధవారం అధికారులు అందించిన కర్రలతో నడకదారిలో భక్తులు కొండపైకి వెళ్లారు. టీటీడీ చైర్మన్ కరుణాకర్ రెడ్డి మాట్లాడుతూ కర్ర చేతిలో ఉంటే భక్తుల్లో ఆత్మస్థైర్యం, మనోధైర్యం పెరుగుతాయన్నారు. చేతిలో కర్ర ఉంటే జంతువులు దాడి చేయవని శాస్త్రీయ వాదన ఉందన్నారు. టీటీడీ నిర్ణయాన్ని చాలా మంది తప్పుబడుతున్నారు. చేతికర్రలు ఇస్తే ప్రయోజనం లేదని, ఫెన్సింగ్ వేయాలన్నారు. దీనిపై టీటీడీ చైర్మన్ స్పందిస్తూ.. ఫెన్సింగ్ కు సంబంధించిన ప్రతిపాదనలను కేంద్ర అటవీ శాఖ ఆధ్వర్యంలోని వైల్డ్ లైఫ్ ఇనిస్టిట్యూట్ ఆఫ్ ఇండియాకు పంపినట్లు తెలిపారు.
