ఆసియా కప్ 2023: ఫైనల్‌లో భారత్ వర్సెస్ పాకిస్థాన్‌కు జరగాల్సింది ఇదే!

కొలంబో: టీమ్ ఇండియా ఆసియా కప్ 2023 ఫైనల్‌లోకి ప్రవేశించింది. సూపర్ 4లో వరుసగా పాకిస్థాన్ మరియు శ్రీలంకలను ఓడించిన రోహిత్ సేన, మరో మ్యాచ్ మిగిలి ఉండగానే మిగిలిన జట్ల కంటే ముందుగానే ఫైనల్‌లోకి ప్రవేశించింది. ప్రస్తుతం టీమ్ ఇండియా రన్ రేట్ కూడా +2.690. దీంతో మిగతా మ్యాచ్‌ల ఫలితాలతో సంబంధం లేకుండా భారత జట్టు ఫైనల్ బెర్త్‌ను ఖరారు చేసుకుంది. ఇక ఫైనల్‌లో టీమిండియాతో ఏ జట్టు తలపడుతుందనేది ఆసక్తికరంగా మారింది. అయితే ఎక్కువ మంది క్రికెట్ అభిమానులు మాత్రం పాకిస్థాన్ ఫైనల్‌కు చేరుకోవాలని కోరుకుంటున్నారు. ఇక ఫైనల్‌లో భారత్-పాకిస్థాన్ మధ్య మ్యాచ్ చూడాలన్నది వారి కోరిక. అయితే ఇది జరగాలంటే పాకిస్థాన్ కూడా ఫైనల్ చేరక తప్పదు. అందుకోసం గురువారం శ్రీలంకతో జరిగే మ్యాచ్‌లో పాకిస్థాన్ గెలవాల్సి ఉంది. అయితే అది అంత సులభం కాదు. ప్రస్తుతం టీమ్ ఇండియా వరుసగా రెండు విజయాలతో 4 పాయింట్లతో పాయింట్ల పట్టికలో అగ్రస్థానంలో ఉంది. ఒక మ్యాచ్‌లో గెలిచి, మరో మ్యాచ్‌లో ఓడిన శ్రీలంక ఖాతాలో రెండు పాయింట్లు ఉన్నాయి. టీమ్ ఇండియా తర్వాత ఆ జట్టు రెండో స్థానంలో ఉంది. పాకిస్థాన్ కూడా ఒక మ్యాచ్ గెలిచి, మరో మ్యాచ్ లో ఓడినా మూడో స్థానంలో ఉంది. ఎందుకంటే పాకిస్థాన్ రన్ రేట్ శ్రీలంక కంటే తక్కువ. శ్రీలంక రన్ రేట్ -0.200 కాగా, పాకిస్థాన్ రన్ రేట్ -1.892. ఇక సూపర్ 4లో ఇప్పటివరకు ఆడిన రెండు మ్యాచ్‌ల్లో ఓడిన బంగ్లాదేశ్ ఫైనల్ రేసు నుంచి నిష్క్రమించింది.

దీంతో భారత్‌తో ఫైనల్‌ ఆడే అవకాశం పాకిస్థాన్‌, శ్రీలంకలకు మాత్రమే ఉంది. ఈ రెండు జట్ల మధ్య గురువారం మ్యాచ్ జరగనుంది. ఈ మ్యాచ్‌లో గెలిచిన జట్టు ఫైనల్‌కు చేరుకుంటుంది. కానీ ఇప్పుడున్న పరిస్థితుల్లో శ్రీలంకను సొంతగడ్డపై ఓడించడం పాకిస్థాన్‌కు అంత సులువు కాదు. అంతేకాదు భారత్‌తో జరిగిన మ్యాచ్‌లో ఆ జట్టు స్టార్ బౌలర్లు హరీస్ రవూఫ్, నసీమ్ షా గాయపడ్డారు. అందుకే ఆ మ్యాచ్‌లో బ్యాటింగ్‌కు కూడా రాలేదు. శ్రీలంకతో మ్యాచ్‌లో ఆడతారా? లేదా? అన్నదానిపై క్లారిటీ లేదు. వీరిద్దరూ దూరంగా ఉంటే లంకను ఓడించడం పాకిస్థాన్‌కు కష్టమే. ఈ మ్యాచ్ రద్దయితే ప్రస్తుత పాయింట్ల పట్టిక ప్రకారం శ్రీలంక ఫైనల్ చేరుతుంది. పాకిస్థాన్ టోర్నీ నుంచి తప్పుకోక తప్పదు. ఫైనల్‌కు చేరాలంటే శ్రీలంకపై పాకిస్థాన్ తప్పక గెలవాలి. దీంతో గురువారం శ్రీలంక-పాకిస్థాన్‌ల మధ్య జరగనున్న మ్యాచ్‌పై ఉత్కంఠ నెలకొంది. సూపర్ 4లో భారత్ తన చివరి మ్యాచ్‌ను శుక్రవారం బంగ్లాదేశ్‌తో ఆడనుంది. ఇప్పటికే ఫైనల్ చేరిన టీమిండియా.. టోర్నీ నుంచి బంగ్లాదేశ్ నిష్క్రమించింది. దీంతో ఈ మ్యాచ్ ఫలితంతో ఇరు జట్లకు ఎలాంటి లాభ నష్టాలు ఉండవు. దీంతో ఈ మ్యాచ్ లో టీమిండియా ప్రయోగాలు చేసే అవకాశాలు కనిపిస్తున్నాయి. సీనియర్లకు విశ్రాంతి ఇవ్వడం ద్వారా బెంచ్ బలాన్ని పరీక్షించే ప్రయత్నం చేయవచ్చు.

నవీకరించబడిన తేదీ – 2023-09-13T16:16:39+05:30 IST