రాయ్పూర్: ఛత్తీస్‌గఢ్ అసెంబ్లీ ఎన్నికల్లో కాంగ్రెస్ పార్టీ విజయం తథ్యమని ఆ పార్టీ జాతీయ అధ్యక్షుడు మల్లికార్జున్ ఖర్గే అన్నారు. ప్రతి ఒక్కరి గుండెల్లో కాంగ్రెస్ పార్టీ ఉందన్నారు. శుక్రవారమిక్కడ ఆయన మీడియాతో మాట్లాడుతూ.. రాష్ట్రంలో కాంగ్రెస్ కు అనుకూల వాతావరణం ఉందని, కాంగ్రెస్ పార్టీ గెలుస్తుందని అందరూ చెబుతున్నారన్నారు. కాంగ్రెస్ పార్టీ ఇచ్చిన హామీలను నిలబెట్టుకుందని, అందుకే ప్రజలు కాంగ్రెస్‌ను గెలిపించాలన్నారు. 70 ఏళ్లలో కాంగ్రెస్ పార్టీ చేసిందేమీ లేదని, కాంగ్రెస్ ఏమీ చేసి ఉండకపోతే మోదీ, అమిత్ షాలు హోంమంత్రి అయ్యేవని బీజేపీ అంటోంది. ఈ దేశ రాజ్యాంగాన్ని కాపాడారని, అందుకే మీరు (మోదీ, అమిత్ షా) ఆ కుర్చీల్లో ఉన్నారని అన్నారు.
అమిత్ షా చురకలు..
మరోవైపు, ఛత్తీస్‌గఢ్ ఎన్నికల ప్రచారంలో ఉన్న కేంద్ర హోంమంత్రి శుక్రవారం పండరియా నియోజకవర్గంలో మాట్లాడుతూ ముఖ్యమంత్రి భూపేష్ బఘేల్ కాంగ్రెస్‌కు ప్రీపెయిడ్ సీఎం అని విమర్శించారు. రాష్ట్ర ఖజానాను కాంగ్రెస్ పార్టీకి ఏటీఎంగా మార్చారని ఆరోపించారు. కాంగ్రెస్ హయాంలో మత మార్పిడులు పెరిగాయని, ప్రతి మనిషికి తన మత విశ్వాసాలను పాటించే హక్కు రాజ్యాంగం కల్పించినప్పటికీ పేద గిరిజనులను మతం మార్చేందుకు కాంగ్రెస్ ప్రభుత్వ యంత్రాంగాన్ని ఉపయోగిస్తోందని ఆరోపించారు. బీజేపీని గెలిపిస్తే ఐదేళ్లలో ఛత్తీస్‌గఢ్‌ను పూర్తిగా అభివృద్ధి చెందిన రాష్ట్రంగా తీర్చిదిద్దుతామని హామీ ఇచ్చారు.
తొంభై అసెంబ్లీ స్థానాలున్న ఛత్తీస్‌గఢ్ అసెంబ్లీ తొలి విడతగా నవంబర్ 7న 20 నియోజకవర్గాల్లో పోలింగ్ జరగనుంది. దాదాపు 70 నియోజకవర్గాల్లో చివరి దశ పోలింగ్ నవంబర్ 17న జరగనుంది. డిసెంబర్ 3న ఫలితాలు వెలువడనున్నాయి.ఇక 2018 అసెంబ్లీ ఎన్నికల్లో కాంగ్రెస్ పార్టీ 90కి 68 సీట్లు గెలుచుకుని అధికారంలోకి వచ్చింది. బీజేపీ కేవలం 15 సీట్లకే పరిమితమైంది. మాజీ సీఎం అజిత్ జోగి నేతృత్వంలోని జనతా కాంగ్రెస్ ఛత్తీస్‌గఢ్ (జే) 5 స్థానాలు, బీఎస్పీ 2 స్థానాల్లో విజయం సాధించాయి.
నవీకరించబడిన తేదీ – 2023-11-03T20:56:17+05:30 IST
