గత 500 ఏళ్లుగా ఎదురుచూస్తున్న హిందువుల కల నేడు (జనవరి 22) నెరవేరింది. అయోధ్యలో రామమందిరం అట్టహాసంగా ప్రారంభమైంది. ప్రధానమంత్రి నరేంద్రమోదీ ముఖ్య అతిథిగా హాజరైన వేల మంది అతిరథ మహారథుల నడుమ అత్యంత ప్రతిష్టాత్మకంగా రామ్ లల్లా ప్రతిష్ఠాపన కార్యక్రమం జరిగింది. ఈ నేపథ్యంలో జనవరి 23 నుంచి సామాన్య భక్తుల కోసం రామమందిరాన్ని తెరవనున్నారు.దీంతో భక్తులంతా శ్రీరాముడిని దర్శించుకునేందుకు అయోధ్యకు వెళ్లేందుకు సిద్ధమవుతున్నారు. ఈ క్రమంలో అయోధ్యకు ప్రత్యేక రైళ్లను ఏర్పాటు చేశారు. ఆయా రాష్ట్రాలకు అనుగుణంగా నిర్దిష్ట తేదీల్లో రైళ్లను కేటాయిస్తారు.
తెలంగాణ నుంచి కూడా ఈ నెల 29 నుంచి అస్తా రైళ్లు సిద్ధం కానున్నాయి. బీజేపీ నేతృత్వంలో ఈ ప్రత్యేక రైళ్లను ఏర్పాటు చేస్తున్నారు. పార్లమెంట్ నియోజకవర్గాల వారీగా భక్తులంతా అయోధ్యకు వెళ్లేలా ఏర్పాట్లు చేశారు. అయితే, పార్లమెంటు పరిధిలోని ఒక్కో అసెంబ్లీ నుంచి 200 మందికి మాత్రమే అయోధ్యకు వెళ్లేందుకు అనుమతి ఉంది. అయోధ్యకు వెళ్లేందుకు 5 రోజుల గడువు ఇస్తున్నారు. మొత్తం 20 కోచ్‌లతో కూడిన ఈ ఆస్తా రైళ్లలో.. ఒక్కో కోచ్‌కు ఒక ఇంచార్జిని నియమిస్తారు. ఒక్కో రైలులో 1400 మందికి ఈ సువర్ణావకాశం కల్పిస్తున్న సంగతి తెలిసిందే. అక్కడ శ్రీరాముడిని దర్శించుకున్న అనంతరం అదే రైలులో తిరుగు ప్రయాణానికి ఏర్పాట్లు చేశారు.
రైళ్లు ఏ ప్రాంతం నుంచి ఎప్పుడు బయలుదేరుతాయి..
1. సికింద్రాబాద్ – జనవరి 29
2. వరంగల్ – జనవరి 30
3. హైదరాబాద్ – జనవరి 31
4. కరీంనగర్ – ఫిబ్రవరి 1
5. మల్కాజిగిరి – ఫిబ్రవరి 2
6. ఖమ్మం – ఫిబ్రవరి 3
7. చేవెళ్ల – ఫిబ్రవరి 5
8. పెద్దపల్లి – ఫిబ్రవరి 6
9. నిజామాబాద్ – ఫిబ్రవరి 7
10. ఆదిలాబాద్ – ఫిబ్రవరి 8
11. మహబూబ్ నగర్ – ఫిబ్రవరి 9
12. మహబూబాబాద్ – ఫిబ్రవరి 10
13. మెదక్ – ఫిబ్రవరి 11
14. భువనగిరి – ఫిబ్రవరి 12
15. నాగర్ కర్నూల్ – 13 ఫిబ్రవరి
16. నల్గొండ – 14 ఫిబ్రవరి
17. జహీరాబాద్ – ఫిబ్రవరి 15
నవీకరించబడిన తేదీ – జనవరి 22, 2024 | 09:17 PM
