భారతదేశంలో ఎయిర్‌బస్ హెలికాప్టర్ల తయారీ కేంద్రం

టాటా గ్రూప్ కంపెనీ TASLతో ఒప్పందం

H125 హెలికాప్టర్ల తయారీ

ముంబై: ఫ్రెంచ్ ఎయిర్‌క్రాఫ్ట్ తయారీ దిగ్గజం ఎయిర్‌బస్ భారతదేశంలో హెలికాప్టర్ల తయారీ కోసం ఫైనల్ అసెంబ్లీ లైన్ (FAL)ని ఏర్పాటు చేయడానికి టాటా గ్రూప్‌తో జతకట్టింది. ఒప్పందంలో భాగంగా, టాటా గ్రూప్ అనుబంధ సంస్థ టాటా అడ్వాన్స్‌డ్ సిస్టమ్స్ లిమిటెడ్ (TASCL) మరియు ఎయిర్‌బస్ హెలికాప్టర్లు సంయుక్తంగా ఈ హెలికాప్టర్ల తయారీ కేంద్రాన్ని ఏర్పాటు చేయనున్నాయి. దేశీయ తయారీ సామర్థ్యాలను మరింతగా విస్తరించేందుకు ఈ ఒప్పందం దోహదపడుతుందని రెండు కంపెనీలు పేర్కొన్నాయి. ఇదిలా ఉండగా, ఎయిర్‌బస్ ఇప్పటికే గుజరాత్‌లోని వడోదరలో C295 సైనిక విమానాల తయారీ కేంద్రాన్ని నిర్వహిస్తోంది. పౌర అవసరాల కోసం హెచ్ 125 హెలికాప్టర్ల తయారీకి తుది అసెంబ్లింగ్ లైన్ ఏర్పాటు చేస్తామని తాజాగా ప్రకటించింది. ఈ హెలికాప్టర్లను ఇక్కడి నుంచి భారత్‌తో సహా పొరుగు దేశాలకు ఎగుమతి చేయనున్నారు. భారత్‌లో ఎయిర్‌బస్‌ ఏర్పాటు చేస్తున్న రెండో ప్లాంట్‌ ఇది. అంతేకాకుండా, ఆత్మనిర్భర్ భారత్ కార్యక్రమం కింద దేశీయ ప్రైవేట్ రంగంలో ఏర్పాటు చేసిన మొదటి హెలికాప్టర్ తయారీ కేంద్రం ఇదే. TASL మరియు Airbus రెండు సంవత్సరాలలో ప్లాంట్‌ను పూర్తి చేసి, 2026 నాటికి మొదటి మేడిన్ ఇండియా H125 హెలికాప్టర్ డెలివరీలను ప్రారంభించాలని భావిస్తున్నాయి. అయితే ఈ హెలికాప్టర్ తయారీ కేంద్రం ఎక్కడ ఉండాలనేది తర్వాత నిర్ణయించబడుతుంది.

ఈ ప్లాంట్‌కు సంబంధించిన పెట్టుబడి వివరాలను రెండు కంపెనీలు వెల్లడించలేదు. మేడిన్ ఇండియా సివిల్ హెలికాప్టర్ తయారీ ద్వారా కొత్త భారతదేశం ఆవిష్కృతం కావడమే కాకుండా దేశీయ హెలికాప్టర్ మార్కెట్‌లోని అవకాశాలను సద్వినియోగం చేసుకునే అవకాశం లభిస్తుందని ఎయిర్‌బస్ సీఈవో గుయిలౌమ్ ఫోరీ అన్నారు. భారత్‌లో ఏరోస్పేస్ ఎకో సిస్టమ్‌ను అభివృద్ధి చేసేందుకు ఎయిర్‌బస్ కట్టుబడి ఉందనడానికి ఇదే నిదర్శనమని ఆయన పేర్కొన్నారు. ప్రైవేట్ రంగంలో టాటా గ్రూప్ తొలి హెలికాప్టర్ అసెంబ్లింగ్ సెంటర్‌ను ఏర్పాటు చేస్తోందని టాటా సన్స్ చైర్మన్ ఎన్ చంద్రశేఖరన్ తెలిపారు.

నవీకరించబడిన తేదీ – జనవరి 27, 2024 | 03:50 AM