ఢిల్లీ: బిజెపి (బీజేపీ) కేంద్ర ఎన్నికల కమిటీ సమావేశం (CEC సమావేశం) ముగిసింది. ఐదు గంటల పాటు సమావేశం జరిగింది. ఈ సమావేశంలో ప్రధాని నరేంద్ర మోదీ పాల్గొన్నారు. తెలంగాణతో పాటు మొత్తం 9 రాష్ట్రాల్లో లోక్‌సభ అభ్యర్థులపై కసరత్తు జరిగినట్లు తెలుస్తోంది. దేశవ్యాప్తంగా 125కి పైగా స్థానాల్లో అభ్యర్థులను ఖరారు చేసే అవకాశం ఉంది. లోక్‌సభ ఎన్నికల షెడ్యూల్ కంటే ముందే బీజేపీ అభ్యర్థుల తొలి జాబితాను ప్రకటించనుంది.
బలహీన స్థానాలకు అభ్యర్థుల ఎంపికపై చర్చ.
సీఈసీ సమావేశంలో బీజేపీ జాతీయ అధ్యక్షుడు జేపీ నడ్డా, ప్రధాని మోదీ, అమిత్ షా, రాజ్‌నాథ్ సింగ్ సహా ఉత్తరప్రదేశ్ ముఖ్యమంత్రి యోగి ఆదిత్యనాథ్, మహారాష్ట్ర ఉప ముఖ్యమంత్రి దేవేంద్ర ఫడ్నవీస్, గుజరాత్ సీఎం భూపేంద్ర పటేల్, మధ్యప్రదేశ్ ముఖ్యమంత్రి మోహన్ యాదవ్, ఛత్తీస్‌గఢ్ ముఖ్యమంత్రి విష్ణు దేవ్ సాయి, ఉత్తరాఖండ్ ముఖ్యమంత్రి పుష్కర్ సింగ్ ధామి, గోవా ముఖ్యమంత్రి ప్రమోద్ సావంత్ పాల్గొన్నారు. అలాగే 2014, 2019 లోక్‌సభ ఎన్నికల్లో ఓడిపోయిన స్థానాలు, బీజేపీ బలహీనంగా ఉన్న స్థానాల్లో అభ్యర్థుల ఎంపికపై కూడా ఈ సమావేశంలో చర్చ జరిగినట్లు సమాచారం.
తెలంగాణ నుంచి ఆరు సీట్లు.
తెలంగాణతో పాటు బీజేపీ తరపున లోక్ సభకు అభ్యర్థుల ఎంపిక తుది దశకు చేరుకుంది. దేశవ్యాప్తంగా 125 సీట్లకు పైగా పోటీ చేసే అభ్యర్థుల తొలి జాబితాను ఈరోజు ప్రకటించే అవకాశం ఉంది. తెలంగాణ నుంచి ఆరు స్థానాల్లో పోటీ చేసే అభ్యర్థుల పేర్లు ఉన్న సంగతి తెలిసిందే. ఈ సమావేశంలో తరుణ్ చుగ్, సునీల్ బన్సాల్, కేంద్ర మంత్రి కిషన్ రెడ్డి, ఎంపీలు లక్ష్మణ్, బండి సంజయ్, డీకే అరుణ, ఈటల రాజేందర్, జితేందర్ రెడ్డి తదితరులు పాల్గొన్నారు. , పొంగులేటి సుధాకర్ రెడ్డి హాజరయ్యారు.
ఆదిలాబాద్ మినహా మూడు చోట్ల.
రాష్ట్రంలో బీజేపీకి నాలుగు సిట్టింగ్ ఎంపీ స్థానాలు ఉండగా.. ఆదిలాబాద్ మినహా మిగిలిన మూడు స్థానాలకు అభ్యర్థులను తొలి జాబితాలోనే ప్రకటించనున్నట్లు సమాచారం. కరీంనగర్ నుంచి బండి సంజయ్, నిజామాబాద్ నుంచి ధర్మపురి అరవింద్, సికింద్రాబాద్ నుంచి కిషన్ రెడ్డి పేర్లు వినిపించిన సంగతి తెలిసిందే. అదేవిధంగా గురువారం బీఆర్‌ఎస్ నుంచి బీజేపీలో చేరిన ఎంపీ రాములు లేదా ఆయన కుమారుడిని నాగర్‌కర్నూల్ బీజేపీ ఎంపీ అభ్యర్థిగా తొలి జాబితాలో ప్రకటించే అవకాశం ఉంది. మల్కాజిగిరి, చేవెళ్ల, మహబూబ్‌నగర్ స్థానాలపై కేంద్ర ఎన్నికల కమిటీ చర్చలు ఓ కొలిక్కి వచ్చినట్లు సమాచారం.
మరింత జాతీయ వార్తలు కోసం ఈ లింక్ క్లిక్ చేయండి
నవీకరించబడిన తేదీ – మార్చి 01, 2024 | 07:22 AM
