Paytm పేమెంట్స్ బ్యాంక్ (PPBL)పై తీసుకున్న చర్యలను పునఃపరిశీలించే అవకాశం లేదని రిజర్వ్ బ్యాంక్ ఆఫ్ ఇండియా (RBI) గవర్నర్ శక్తికాంత దాస్ స్పష్టం చేశారు. అన్ని కోణాల నుంచి ఎన్నో ఆలోచనలు…
RBI గవర్నర్ శక్తికాంత దాస్
న్యూఢిల్లీ: Paytm పేమెంట్స్ బ్యాంక్ (PPBL)పై తీసుకున్న చర్యలను పునఃపరిశీలించే అవకాశం లేదని రిజర్వ్ బ్యాంక్ ఆఫ్ ఇండియా (RBI) గవర్నర్ శక్తికాంత దాస్ స్పష్టం చేశారు. అన్ని కోణాల్లో పరిశీలించిన తర్వాతే ఈ నిర్ణయం తీసుకున్నట్లు తెలిపారు. ఆర్బీఐ ఏ ఫిన్‌టెక్ కంపెనీకి వ్యతిరేకం కాదని, ఈ రంగానికి మద్దతునిస్తుందని, దాని వేగవంతమైన అభివృద్ధికి అవసరమైన సహకారాన్ని అందిస్తామని చెప్పారు. అదే సమయంలో డిపాజిటర్లు, కస్టమర్ల ప్రయోజనాలను పరిరక్షించడం తమ ప్రధాన బాధ్యత అని దాస్ గుర్తు చేశారు. ఏ కంపెనీ అయినా పదే పదే నిబంధనలను ఉల్లంఘిస్తే, పదే పదే హెచ్చరించినా తన వైఖరి మార్చుకోకుంటే మాత్రం ఆర్బీఐ చర్యలు తీసుకుంటుందని దాస్ స్పష్టం చేశారు. పేటీఎం కేసును అన్ని కోణాల్లో క్షుణ్ణంగా పరిశీలించిన తర్వాతే చర్యలు తీసుకున్నామని చెప్పారు. ఆర్బీఐ సెంట్రల్ బోర్డు 606వ సమావేశం అనంతరం ఆయన విలేకరులతో మాట్లాడుతూ ఈ వ్యాఖ్యలు చేశారు. ఈ సందర్భంగా ఆర్థిక మంత్రి నిర్మలా సీతారామన్‌ ప్రసంగించారు. గత నెల 31న, ఫిబ్రవరి 29వ తేదీ నుంచి ఎలాంటి డిపాజిట్లను స్వీకరించకూడదని, కస్టమర్ ఖాతాలు, వాలెట్లు, ఫాస్ట్‌ట్యాగ్‌లను టాప్ అప్ చేయకూడదని ఆర్బీఐ పీపీబీఎల్‌పై నిషేధం విధించింది. నిబంధనల ఉల్లంఘనపై పేటీఎంను పలుమార్లు హెచ్చరించామని, అయితే అదే పరిస్థితి కొనసాగిందని, కాబట్టి ఎలాంటి చర్యలు తీసుకోక తప్పదని ప్రకటన స్పష్టం చేసింది. దీనిపై విలేకరులు అడిగిన ప్రశ్నలకు ఆయన స్పందిస్తూ.. ఆ నిర్ణయానికి ఇప్పట్లో సడలింపులు ఇచ్చే అవకాశం లేదన్నారు.
FAQల జారీ త్వరలో: తమ నిర్ణయం వల్ల అసౌకర్యానికి గురవుతున్న డిపాజిటర్లు, కస్టమర్లు, వాలెట్ యూజర్లు, ఫాస్ట్ ట్యాగ్ హోల్డర్ల సందేహాలను నివృత్తి చేసేందుకు త్వరలో FAQలు జారీ చేస్తామని దాస్ స్పష్టం చేశారు. ఈ FAQలలో కస్టమర్ల ప్రయోజనాలన్నీ పరిగణించబడతాయి. కస్టమర్లకు ఎలాంటి అసౌకర్యం కలగకూడదనేది ఆర్బీఐ వైఖరి అని అన్నారు. అందుకే ఆ FAQలలో అన్ని రకాల వివరణలు పొందుపరుస్తామని RBI గవర్నర్ దాస్ తెలిపారు.
నవీకరించబడిన తేదీ – ఫిబ్రవరి 13, 2024 | 05:46 AM
