వైజాగ్: ఇంగ్లండ్‌తో జరుగుతున్న రెండో టెస్టులో టీమిండియా యువ ఓపెనర్ యశస్వి జైస్వాల్ విశ్వరూపం ప్రదర్శించాడు. ఇంగ్లండ్ బౌలర్లపై విరుచుకుపడిన జైస్వాల్ డబుల్ సెంచరీ సాధించాడు. తన విధ్వంసక బ్యాటింగ్‌తో 290 బంతుల్లో 19 ఫోర్లు, 7 సిక్సర్లతో 209 పరుగులు చేశాడు. మిగతా భారత బ్యాట్స్‌మెన్ విఫలమైన వైజాగ్ పిచ్‌పై జైస్వాల్ పరుగుల వరద పారించాడు. వరుసగా సిక్సర్లు, ఫోర్లు బాదిన జైస్వాల్ కేవలం 277 బంతుల్లోనే డబుల్ సెంచరీ పూర్తి చేసుకున్నాడు. ఈ మ్యాచ్‌లో జైస్వాల్ ఫోర్‌తో హాఫ్ సెంచరీ, సిక్స్‌తో సెంచరీ, ఫోర్‌తో 150 పరుగులు, ఫోర్‌తో డబుల్ సెంచరీ పూర్తి చేశాడు. జైస్వాల్ ఊచకోతతో భారత జట్టు తొలి ఇన్నింగ్స్‌లో 396 పరుగులు చేసింది. ఈ క్రమంలో జైస్వాల్ ఎన్నో రికార్డులను తన ఖాతాలో వేసుకున్నాడు.
1. టెస్టు క్రికెట్‌లో వైజాగ్‌లో డబుల్ సెంచరీ చేసిన రెండో బ్యాట్స్‌మెన్‌గా జైస్వాల్ నిలిచాడు. అంతకుముందు మయాంక్ అగర్వాల్ కూడా ఇక్కడ డబుల్ సెంచరీ సాధించాడు.
2. అతి పిన్న వయసులో డబుల్ సెంచరీ సాధించిన మూడో భారతీయ బ్యాట్స్‌మెన్‌గా జైస్వాల్ నిలిచాడు. జైస్వాల్ 22 ఏళ్ల 37 రోజుల వయసులో డబుల్ సెంచరీ పూర్తి చేశాడు. ఈ జాబితాలో మాజీ క్రికెటర్ వినోద్ కాంబ్లీ అగ్రస్థానంలో ఉన్నాడు. కాంబ్లీ 21 ఏళ్ల 35 రోజుల వయసులో, 21 ఏళ్ల 55 రోజుల వయసులో రెండుసార్లు డబుల్ సెంచరీ మార్కును చేరుకున్నాడు. ఆ తర్వాత 21 ఏళ్ల 283 రోజుల వయసులో డబుల్ సెంచరీ సాధించిన సునీల్ గవాస్కర్ రెండో స్థానంలో ఉన్నాడు.
3. టెస్టు క్రికెట్‌లో భారత్ తరఫున డబుల్ సెంచరీ చేసిన నాలుగో ఎడమచేతి వాటం బ్యాట్స్‌మెన్‌గా జైస్వాల్ నిలిచాడు. జైస్వాల్ కంటే ముందు సౌరవ్ గంగూలీ, వినోద్ కాంబ్లీ రెండంకెల స్కోరు చేయగా, గౌతమ్ గంభీర్ డబుల్ సెంచరీ సాధించాడు.
4. అతి తక్కువ ఇన్నింగ్స్‌లో డబుల్ సెంచరీ సాధించిన ఐదో భారతీయ బ్యాట్స్‌మెన్‌గా యశస్వి జైస్వాల్ నిలిచాడు. జైస్వాల్ తన 10వ ఇన్నింగ్స్‌లో డబుల్ సెంచరీ సాధించాడు. తన మూడో ఇన్నింగ్స్‌లో డబుల్ సెంచరీ చేసిన కరుణ్ నాయర్ అగ్రస్థానంలో ఉన్నాడు. వినోద్ కాంబ్లీ, సునీల్ గవాస్కర్, మయాంక్ అగర్వాల్, చటేశ్వర్ పుజారా తర్వాతి స్థానాల్లో ఉన్నారు.
5. ప్రపంచ టెస్ట్ ఛాంపియన్‌షిప్ చరిత్రలో డబుల్ సెంచరీ సాధించిన నాలుగో భారతీయ బ్యాట్స్‌మెన్‌గా జైస్వాల్ నిలిచాడు. జైస్వాల్ కంటే ముందు విరాట్ కోహ్లీ, మయాంక్ అగర్వాల్, రోహిత్ శర్మలు కూడా ఈ ఘనత సాధించారు.
మరింత క్రీడా వార్తలు కోసం ఇక్కడ క్లిక్ చేయండి
నవీకరించబడిన తేదీ – ఫిబ్రవరి 03, 2024 | 12:13 PM
