నోటిఫికేషన్లు వస్తున్నాయి
గ్రూప్ 2, 3, 4 పోస్టులకు షెడ్యూల్.. డిసెంబర్‌లో వరుసగా..
మే నెల తర్వాత రాత పరీక్షలకు టీఎస్‌పీఎస్సీ ఏర్పాట్లు చేస్తోంది
గ్రూప్-1 ప్రిలిమ్స్ ఫలితాలు త్వరలో ఖరారు కానున్నాయి
హైదరాబాద్ , నవంబరు 25 (ఆంధ్రజ్యోతి): డిసెంబర్‌లో గ్రూప్-2, 3, 4 పోస్టుల భర్తీకి నోటిఫికేషన్ విడుదల చేయాలని టీఎస్‌పీఎస్సీ భావిస్తోంది. ప్రభుత్వ అనుమతి మేరకు ఖాళీల భర్తీకి కమిషన్ వేర్వేరు రిక్రూట్‌మెంట్ నోటిఫికేషన్‌లను విడుదల చేస్తుంది. నోటిఫికేషన్ల అనంతరం మూడు, నాలుగు నెలల్లో రాత పరీక్షలను నిర్వహించేందుకు చర్యలు చేపట్టారు. ప్రభుత్వం అనుమతించిన 9,168 గ్రూప్-4 పోస్టులతో పాటు ఇప్పటికే గ్రీన్ సిగ్నల్ ఇచ్చిన 783 గ్రూప్-2, 1,373 గ్రూప్-3 పోస్టులకు కూడా నోటిఫికేషన్లు రానున్నాయి. దీంతోపాటు దాదాపు 1000 ఫారెస్ట్ బీట్ ఆఫీసర్ పోస్టుల భర్తీకి ప్రకటన విడుదల చేయాల్సి ఉంది. డిసెంబర్ 31లోగా ఆయా పోస్టుల భర్తీకి నోటిఫికేషన్ విడుదల చేయాలని కమిషన్ అధికారులు భావిస్తున్నారు.దరఖాస్తుల స్వీకరణకు నెల రోజుల గడువు ఇవ్వబడుతుంది. అలాగే, అభ్యర్థుల ప్రిపరేషన్‌కు 3 నెలల సమయం ఉండేలా రాత పరీక్షల షెడ్యూల్‌ను తయారు చేస్తున్నారు. సాధారణంగా మార్చి, ఏప్రిల్‌లో రాష్ట్రంలో 10వ, ఇంటర్‌ పబ్లిక్‌ పరీక్షలు నిర్వహిస్తారు. ఈ సమయంలో గ్రూప్ పరీక్షలు నిర్వహించకూడదని అధికారులు భావిస్తున్నారు.
అంటే… మే నెల తర్వాత గ్రూప్ పరీక్షలు నిర్వహించే అవకాశం ఉంది. ప్రతి అభ్యర్థి తనకు అర్హత ఉన్న అన్ని పోస్టులకు పోటీపడేలా పరీక్షల షెడ్యూల్‌ను సిద్ధం చేస్తున్నారు. కాగా, గ్రూప్-1 ప్రిలిమినరీ పరీక్ష ఫలితాలపై అధికారులు త్వరలో నిర్ణయం తీసుకోనున్నారు. ఈ పరీక్షకు సంబంధించిన ఫైనల్ కీ ఇప్పటికే విడుదలైనప్పటికీ ఫలితాలు మాత్రం వెల్లడించలేదు. ఈ పోస్టుల భర్తీలో మహిళా రిజర్వేషన్లపై కొందరు కోర్టును ఆశ్రయించడంతో ఫలితాలు ప్రకటించలేదు. దీనిపై వచ్చే వారంలోగా స్పష్టత వస్తుందని అధికారులు భావిస్తున్నారు. ఆ తర్వాత ప్రిలిమ్స్ ఫలితాలు వెలువడే అవకాశం ఉంది. అయితే… ముందుగా నిర్ణయించిన షెడ్యూల్ ప్రకారం జనవరి, ఫిబ్రవరి నెలల్లో గ్రూప్-1 మెయిన్స్ పరీక్షలు నిర్వహించనున్నారు. మారిన పరిస్థితుల కారణంగా ఈ పరీక్షలు ఆలస్యమయ్యే అవకాశం ఉంది.
ఫిబ్రవరి 26న అకౌంట్స్ ఆఫీసర్స్ పరీక్ష
కాగా, డివిజనల్ అకౌంట్స్ ఆఫీసర్స్ గ్రేడ్-2 పోస్టుల భర్తీకి వచ్చే ఏడాది ఫిబ్రవరి 26న పరీక్ష నిర్వహించనున్నట్లు టీఎస్‌పీఎస్సీ ప్రకటించింది. అభ్యర్థులు పరీక్షకు వారం రోజుల ముందు వెబ్‌సైట్ నుంచి హాల్ టిక్కెట్లను డౌన్‌లోడ్ చేసుకోవచ్చు. ఈ మేరకు కమిషన్ శుక్రవారం ఒక ప్రకటన విడుదల చేసింది.
నవీకరించబడిన తేదీ – 2022-11-26T11:07:38+05:30 IST
