సీఎం స్టాలిన్: రెండేళ్లలో రూ.2.97 లక్షల కోట్ల పెట్టుబడులను ఆకర్షించాం..

– ఆర్థిక సలహాదారులతో సీఎం

అడయార్ (చెన్నై): తన నేతృత్వంలో డీఎంకే ప్రభుత్వం ఏర్పడిన తర్వాత గత రెండేళ్లలో ఉత్పత్తి రంగంలో రూ.2.97 లక్షల కోట్ల పెట్టుబడులు వచ్చాయని సీఎం స్టాలిన్ వెల్లడించారు. మంగళవారం తన క్యాంపు కార్యాలయంలో రాష్ట్ర ఆర్థిక సలహాదారులతో సమీక్షా సమావేశం నిర్వహించారు. ఈ సందర్భంగా ఆయన మాట్లాడుతూ.. రాష్ట్రంలో డీఎంకే ప్రభుత్వం ఏర్పాటైన తర్వాత అభివృద్ధి ఫలాలను ప్రజల్లోకి తీసుకెళ్లేందుకు ప్రత్యేక దృష్టి సారించామన్నారు. ఇందుకోసం ప్రతి సంక్షేమ పథక రూపకల్పన మొదలు సక్రమంగా అమలయ్యే వరకు పలు రంగాలకు చెందిన నిపుణుల అభిప్రాయాలను సేకరించి, వినడంతో పాటు అగ్రశ్రేణి ఆర్థిక నిపుణుల సలహాలు కూడా తీసుకుంటారు. ఉత్పత్తి రంగంలో గత రెండేళ్లలో మిత్సుబిషి వంటి విదేశీ కంపెనీలతో 241 ఒప్పందాలు కుదుర్చుకుని రూ.2,97,196 లక్షల కోట్ల పెట్టుబడులను ఆకర్షించామని గుర్తు చేశారు.

‘మక్కలై తేది మరుత్తువం’ పథకం వల్ల పేద, మధ్య తరగతి ప్రజల వైద్య ఖర్చులు గణనీయంగా తగ్గాయన్నారు. రాష్ట్ర ప్రణాళికా సంఘం ఇచ్చిన నివేదికలో ఈ పథకం ప్రజలకు ఎంతో మేలు చేస్తుందని పేర్కొన్నారు. ఈ పథకంతో పాటు విద్యాశాఖ ‘ఇల్లం తేది కల్వి’ అనే పథకాన్ని ప్రవేశపెట్టిందని, దీని కింద ఇప్పటివరకు 27 లక్షల మంది విద్యార్థులు లబ్ధి పొందారని తెలిపారు. ఈ ఏడాది సెప్టెంబర్‌ను ద్రవిడ మాసంగా పాటిస్తున్నట్లు తెలిపారు. కలైంగర్ మగళిర్ ఉరిమై తొగై పథకం అన్న జయంతి రోజైన సెప్టెంబర్ 15 నుంచి ప్రారంభం కానుంది. కుటుంబం కోసం అహర్నిశలు శ్రమించే మహిళలకు ఈ పథకం ద్వారా తగిన గుర్తింపు లభిస్తుందన్నారు. ప్రభుత్వ కలల పథకమైన ‘మహిళలకు నెలకు రూ.1000’ పథకంలో అర్హులైన మహిళల ఎంపిక శరవేగంగా సాగుతున్నదన్నారు. ఇప్పటికే 1.54 కోట్ల దరఖాస్తులు వచ్చాయని, ఇలాంటి పథకాల రూపకల్పనలో ఆర్థిక సలహాదారుల సూచనలు, సలహాలు వెలకట్టలేనివని సీఎం స్టాలిన్ పేర్కొన్నారు.

నవీకరించబడిన తేదీ – 2023-08-23T09:00:00+05:30 IST