చెన్నై: వన్డే ప్రపంచకప్‌లో భాగంగా ఆస్ట్రేలియాతో జరుగుతున్న మ్యాచ్‌లో టీమిండియా సీనియర్ ఆటగాడు విరాట్ కోహ్లీ అద్భుత ఫీల్డింగ్‌తో ఆకట్టుకున్నాడు. పేస్ గన్ జస్ప్రీత్ బుమ్రా వేసిన మూడో ఓవర్ రెండో బంతికి ఆస్ట్రేలియా ఓపెనర్ మిచెల్ మార్ష్ డిఫెన్స్ ఆడేందుకు ప్రయత్నించాడు. కానీ బంతి బయట అంచుని తీసుకుని స్లిప్స్ వైపు వెళ్లింది. సెకండ్ స్లిప్ వద్ద ఫీల్డింగ్ చేస్తున్న విరాట్ కోహ్లి తన ఎడమవైపు డైవ్ చేసి బంతిని అద్భుతంగా తీసుకున్నాడు. అద్భుత ఫీల్డింగ్ తో ఖాతా తెరవకుండానే మిచెల్ మార్ష్ ను కోహ్లి అవుట్ చేశాడు. 6 బంతులు ఆడిన మార్ష్ డకౌట్ అయ్యాడు. దీంతో ఆస్ట్రేలియా 5 పరుగుల వద్ద తొలి వికెట్ కోల్పోయింది. కాగా, విరాట్ కోహ్లీ పట్టిన ఈ సూపర్ క్యాచ్ వీడియో సోషల్ మీడియాలో వైరల్‌గా మారింది.
ఈ క్రమంలో విరాట్ కోహ్లి కూడా రికార్డు సృష్టించాడు. వన్డే ప్రపంచకప్‌ల చరిత్రలో అత్యధిక క్యాచ్‌లు పట్టిన భారత ఫీల్డర్‌గా నిలిచాడు. ఈ క్రమంలో భారత మాజీ క్రికెటర్ అనిల్ కుంబ్లే రికార్డును బద్దలు కొట్టాడు. కుంబ్లే 14 క్యాచ్‌లు పట్టగా, విరాట్ కోహ్లీ 15 క్యాచ్‌లతో చరిత్ర సృష్టించాడు. ఇక మ్యాచ్ విషయానికొస్తే.. టాస్ గెలిచి బ్యాటింగ్ ప్రారంభించిన ఆస్ట్రేలియా 15 ఓవర్లు ముగిసే సరికి వికెట్ నష్టానికి 71 పరుగులు చేసింది. డేవిడ్ వార్నర్ (40), స్టీవ్ స్మిత్ (31) క్రీజులో ఉన్నారు. వీరిద్దరూ రెండో వికెట్‌కు అజేయ అర్ధ సెంచరీ భాగస్వామ్యాన్ని నెలకొల్పారు.
చివరి జట్లు
ఆస్ట్రేలియా: డేవిడ్ వార్నర్, మిచెల్ మార్ష్, స్టీవెన్ స్మిత్, మార్నస్ లాబుషాగ్నే, కామెరాన్ గ్రీన్, అలెక్స్ కారీ (వికెట్ కీపర్), గ్లెన్ మాక్స్‌వెల్, పాట్ కమిన్స్ (కెప్టెన్), మిచెల్ స్టార్క్, జోష్ హేజిల్‌వుడ్, ఆడమ్ జంపా
భారత్: రోహిత్ శర్మ (కెప్టెన్), ఇషాన్ కిషన్, విరాట్ కోహ్లీ, శ్రేయాస్ అయ్యర్, కేఎల్ రాహుల్ (వికెట్ కీపర్), హార్దిక్ పాండ్యా, రవీంద్ర జడేజా, రవిచంద్రన్ అశ్విన్, కుల్దీప్ యాదవ్, జస్ప్రీత్ బుమ్రా, మహ్మద్ సిరాజ్
నవీకరించబడిన తేదీ – 2023-10-08T15:16:48+05:30 IST
