‘నన్ను హీరోగా పరిచయం చేస్తూ మా నాన్న అచ్యుతరావు ఐదు సినిమాలు చేయడం నిజంగా నా అదృష్టం. తప్పకుండా నా ప్రతిభను నిరూపించుకుంటాను. ప్రేక్షకులకు మరింత చేరువైన కొత్త హీరో…
‘నన్ను హీరోగా పరిచయం చేస్తూ మా నాన్న అచ్యుతరావు ఐదు సినిమాలు చేయడం నిజంగా నా అదృష్టం. తప్పకుండా నా ప్రతిభను నిరూపించుకుంటాను. కొత్త హీరోని ప్రేక్షకులకు చేరువ చేసే అన్ని అంశాలు ‘ఉపేంద్రగాడి అడ్డా’లో ఉన్నాయి’ అని కంచర్ల ఉపేంద్ర అన్నారు. ఆయన నటించిన ‘ఉపేంద్రగాడి అడ్డా’ చిత్రం డిసెంబర్ 1న విడుదలవుతోంది.మంగళవారం ఆయన మీడియాతో మాట్లాడారు. ‘ఒకరోజు వైజాగ్ ఆర్టిస్టుల పిక్నిక్‌కి ముఖ్య అతిథిగా వెళ్లాను. అక్కడ ఓ దర్శకుడు నన్ను చూసి హీరోగా మెచ్చుకుని కథ చెప్పారని, అది నాకు, మా నాన్నకు నచ్చడంతో సినిమాల్లోకి వచ్చాను. నా మొదటి సినిమా ‘కంచర్ల’ షూటింగ్ గతేడాది పవన్ కళ్యాణ్ పుట్టినరోజున మొదలైంది. అలా మిగిలిన నాలుగు సినిమాలు వరుసగా మొదలయ్యాయి’ అన్నారాయన. ‘ఉపేంద్రగాడి అడ్డా’ యూత్ ఫుల్ మాస్ ఎంటర్‌టైనర్. అలాగే మంచి సందేశం, అందరికీ కనెక్ట్ అయ్యే సినిమా. ఆర్యన్ కె సుభాన్ దర్శకత్వం వహిస్తున్నారు. ఉపేంద్ర అనే పేరు ఉన్నవాళ్లు ఉన్నత స్థానాల్లో ఉండడం వల్ల, వాళ్లలాగే నా జీవితం బాగుండాలని మా అమ్మ నాకు ‘ఉపేంద్ర’ అని పేరు పెట్టారు. మన ఉత్తర ఆంధ్ర ప్రాంతంలో ఈ పేరుతో ఉన్న వారి సంఖ్య తక్కువ. హీరోగా నాకంటూ ఓ స్టైల్‌ ఏర్పాటు చేసుకోవాలనుకుంటున్నాను’ అని ఉపేంద్ర అన్నారు. ‘నేను హీరోగా 11 సినిమాలు చేయాలని మా నాన్నగారు కోరుకుంటున్నారు. ఇప్పటికి నాలుగు సినిమాలు మొదలై 70 శాతం పూర్తయ్యాయి. ఐదో సినిమాగా మొదలైన ‘ఉపేంద్రగాడి అడ్డా’ ముందుగా విడుదలవుతోంది. ఆరో చిత్రం ‘1920 భీమునిపట్నం’ వచ్చే నెలలో ప్రారంభం కానుంది. కొత్త దర్శకులు, నటీనటులను ప్రోత్సహించాలనే ఉద్దేశంతో నాన్నగారు సినిమా నిర్మాణ సంస్థను స్థాపించారు. అలాగే ఉపకార్ చారిటబుల్ ట్రస్ట్ ద్వారా అనేక సేవా కార్యక్రమాలు నిర్వహిస్తున్నారు. తన తదుపరి చిత్రం సంక్రాంతికి విడుదలవుతుందని, కొత్తవారిని ఆదరించాలని, కంటెంట్ ఉన్న సినిమాలు విజయం సాధించాలని ఉపేంద్ర కోరారు.
నవీకరించబడిన తేదీ – 2023-11-29T01:14:04+05:30 IST
