న్యూఢిల్లీ: విక్షిత్ భారత్ సంకల్ప్ యాత్ర లబ్ధిదారులతో ప్రధాని నరేంద్ర మోదీ శనివారం వీడియో కాన్ఫరెన్స్ ద్వారా సంభాషించారు. దేశంలోని ప్రతి మారుమూల ప్రాంతానికీ ‘మోదీ గ్యారెంటీ వెహికల్’ చేరుతుందని ఆశాభావం వ్యక్తం చేశారు. రాజస్థాన్, మధ్యప్రదేశ్, ఛత్తీస్‌గఢ్, తెలంగాణ, మిజోరం రాష్ట్రాల్లో ‘వికాస్ సంకల్ప్ యాత్ర’ను మోదీ జెండా ఊపి ప్రారంభించారు. వికాసిత్ భారత్ సంకల్ప్‌ను ప్రోత్సహించాలని రాష్ట్ర ప్రభుత్వాలకు విజ్ఞప్తి చేశారు.
ఈ సందర్భంగా ప్రధాని మాట్లాడుతూ, అభివృద్ధి చెందిన భారతదేశమే లక్ష్యంగా చేపట్టిన మోదీ గ్యారెంటీ వెహికల్ కింద దేశంలోని ప్రతి ప్రాంతానికి చేరుకోవాలని కృతనిశ్చయంతో ఉన్నామన్నారు. వికాసిత్ భారత్ సంకల్ప్ యాత్ర కేవలం నెల రోజుల్లోనే వేలాది గ్రామాలు, 1,500 నగరాలకు చేరుకుందని చెప్పారు. అభివృద్ధి చెందిన భారతదేశాన్ని సాధించడంలో మన నగరాలు కీలకపాత్ర పోషిస్తున్నాయన్నారు. స్వాతంత్య్రం వచ్చిన తర్వాత చాలా కాలం పాటు కొన్ని పెద్ద నగరాలు మాత్రమే అభివృద్ధికి నోచుకున్నాయని, నేడు టైర్-2, 3 నగరాలపై కూడా దృష్టి సారిస్తున్నాయన్నారు. అమృత్ మిషన్ లేదా స్మార్ట్ సిటీ మిషన్ ద్వారా చిన్న నగరాల్లో కూడా కనీస సౌకర్యాలు మెరుగుపరుస్తున్నామని, నీటి సరఫరా, డ్రైనేజీ, మురుగునీటి వ్యవస్థ, ట్రాఫిక్ వ్యవస్థ, సీసీటీవీ నెట్‌వర్క్‌లను నిరంతరం అప్‌గ్రేడ్ చేస్తున్నామని చెప్పారు. పరిశుభ్రత, పబ్లిక్ టాయిలెట్లు, ఎల్ ఈడీ వీధి దీపాలు ఏర్పాటు చేయడం వల్ల సులభతర వాణిజ్యం జరగడంతోపాటు జీవన విధానం సులభతరం అవుతుందన్నారు. పేదలు, రైతులు, చిరు వ్యాపారులు, ఇతర సామాజిక వర్గాలకు తమ ప్రభుత్వం అండగా నిలుస్తుందన్నారు.
కాగా, శనివారం ఐదు రాష్ట్రాల్లో మోదీ ప్రారంభించిన వికాసిత్ భారత్ సంకల్ప యాత్ర కార్యక్రమంలో లబ్ధిదారులతో పాటు కేంద్ర మంత్రులు, ఎంపీలు, ఎమ్మెల్యేలు, స్థానిక ప్రజాప్రతినిధులు పెద్ద సంఖ్యలో పాల్గొన్నారు. కేంద్ర ప్రభుత్వ ప్రతిష్ఠాత్మక పథకాలు నిర్ణీత వ్యవధిలో లబ్ధిదారులందరికీ చేరవేయాలనే సంకల్పంతో కేంద్రం దేశవ్యాప్తంగా వికాసిత్ సంకల్ప యాత్రను చేపడుతోంది.
నవీకరించబడిన తేదీ – డిసెంబర్ 16, 2023 | 07:26 PM
