మహారాష్ట్ర: ఆయన శివసేన అధినేత…స్పీకర్ సంచలన నిర్ణయం

ముంబై: దాదాపు 18 నెలలుగా స్పీకర్ నిర్ణయం కోసం ఎదురుచూస్తున్న శివసేన ఉద్ధవ్ ఠాక్రే (శివసేన యూబీటీ)కి మహారాష్ట్రలో ఊహించని ఎదురుదెబ్బ తగిలింది. ముఖ్యమంత్రి ఏక్‌నాథ్ షిండే వర్గమే అసలు శివసేన అని స్పీకర్ రాహుల్ నార్వేకర్ బుధవారం స్పష్టం చేశారు. సీఎం ఏక్‌నాథ్ షిండేను శివసేన నుంచి తొలగించే అధికారం శివసేన (యూబీటీ)కి లేదని ఆయన తేల్చారు. శివసేన అధినేతగా ఉద్ధవ్ ఠాక్రే కొనసాగాలన్న ఫిర్యాదును శివసేన నేతలు తోసిపుచ్చారు. పార్టీ అధినేతగా సీఎం ఏక్‌నాథ్ షిండేను ఆపలేమని నర్వేకర్‌ స్పష్టమైన తీర్పు ఇచ్చారు.

శివసేన విభజన నేపథ్యం..

జూన్ 2022లో, షిండే మరియు పలువురు ఎమ్మెల్యేలు ఉద్ధవ్ థాకరే నేతృత్వంలోని శివసేనపై తిరుగుబాటు బావుటా ఎగురవేశారు. దీంతో శివసేనలో చీలిక వచ్చింది. షిండే మరియు అతని ఎమ్మెల్యేల బృందం బిజెపికి మద్దతు ప్రకటించడంతో ఉద్ధవ్ నేతృత్వంలోని మహా వికాస్ అఘాడి ప్రభుత్వం కూలిపోయింది. షిండే ముఖ్యమంత్రిగా బీజేపీతో కలిసి ప్రభుత్వాన్ని ఏర్పాటు చేశారు. షిండేతో పాటు ఫిరాయించిన ఎమ్మెల్యేలపై అనర్హత వేటు వేయాలని ఠాక్రే వర్గం స్పీకర్‌కు ఫిర్యాదు చేయగా, షిండే వర్గం కూడా తామే నిజమైన శివసేన అంటూ ఠాక్రే గ్రూపుపై అనర్హత వేటు వేయాలని స్పీకర్‌కు ఫిర్యాదు చేసింది. ఈ క్రమంలో ఎన్నికల సంఘం షిండే శివసేనను అసలు శివసేనగా ప్రకటించి ఆ వర్గానికి పార్టీ గుర్తును కేటాయించింది. కాగా, ఎమ్మెల్యేల అనర్హత పిటిషన్లపై నిర్ణయం తీసుకునేలా స్పీకర్‌ను ఆదేశించాలని ఉద్ధవ్ బృందం సుప్రీంకోర్టును ఆశ్రయించింది. అసలు శివసేన తమదేనంటూ షిండే గ్రూప్ సుప్రీంకోర్టులో పిటిషన్ కూడా వేసింది. దీంతో ఎమ్మెల్యేలపై అనర్హత పిటిషన్లపై తుది నిర్ణయం ప్రకటించాలని స్పీకర్‌ను ఆదేశించిన సుప్రీంకోర్టు జనవరి 10వ తేదీని తుది గడువుగా ప్రకటించింది. ఎట్టకేలకు స్పీకర్ బుధవారం తన నిర్ణయాన్ని ప్రకటించి.. 37 మంది ఎమ్మెల్యేల మద్దతు షిండే వర్గానిదేనని, ఆయన వర్గమే అసలు శివసేన అని సంచలన రూలింగ్ ఇచ్చారు. స్పీకర్ తీర్పుతో మహారాష్ట్ర ముఖ్యమంత్రిగా ఏక్నాథ్ షిండే కొనసాగేందుకు అన్ని అడ్డంకులు తొలగిపోయాయి.

నవీకరించబడిన తేదీ – జనవరి 10, 2024 | 06:51 PM