రాష్ట్రంలో మళ్లీ ఎల్టీటీఈ ఉద్యమం మొదలైందా?.. ఇటీవల ఆయుధాల స్మగ్లింగ్ పెరిగిందా?…
– ఆయుధాల స్మగ్లింగ్‌లో 13 మంది అరెస్టు
– రాష్ట్రవ్యాప్తంగా కేంద్ర ఇంటెలిజెన్స్‌తో తీవ్ర నిఘా
– బీచ్‌ల వద్ద భద్రత కట్టుదిట్టం
చెన్నై, (ఆంధ్రజ్యోతి): రాష్ట్రంలో మళ్లీ ఎల్టీటీఈ కదలిక మొదలైందా?.. ఇందులో భాగంగానే ఇటీవల ఆయుధాల స్మగ్లింగ్ పెరిగిపోయిందా?… అవుననే అంటున్నాయి కేంద్ర నిఘా వర్గాలు. అందుకే శ్రీలంకలో తమిళుల జాడలున్న ప్రతిచోటా నిఘా పటిష్టం చేసినట్లు తెలుస్తోంది. శ్రీలంకలోని నిషేధిత ఉగ్రవాద సంస్థ ఎల్టీటీఈకి కొత్త నిఘాను అందించేందుకు పాకిస్థాన్, రాష్ట్రం నుంచి పెద్ద ఎత్తున ఆయుధాల స్మగ్లింగ్ జరుగుతోందని కేంద్ర నిఘా వర్గాలు భావిస్తున్నాయి. తిరుచ్చి శ్రీలంక శరణార్థి శిబిరంలో తలదాచుకున్న శ్రీలంకకు చెందిన కొందరు ఆయుధాల అక్రమ రవాణాకు పాల్పడుతున్నట్లు వెల్లడైన సమాచారం మేరకు ఇటీవల ఎన్ఐఏ అధికారులు ఉలరవాక్కంలో 13 మందిని అరెస్టు చేసిన సంగతి తెలిసిందే. 2021లో కేరళలోని విళింజమ్ బీచ్‌లో మారణాయుధాలతో బోటు కొట్టిన కేసుతో తమకు సంబంధం ఉందని ఎన్ఐఏ అధికారులు నిర్ధారించారు.ఈ నేపథ్యంలో స్థానిక సెలయూర్‌లో తలదాచుకున్న ఆదిలింగం అనే వ్యక్తిని ఎన్ఐఏ అధికారులు అరెస్టు చేశారు. శ్రీలంకకు మారణాయుధాల అక్రమ రవాణా. పాకిస్థాన్ నుంచి శ్రీలంకకు మారణాయుధాలు తరలిస్తున్న ముఠా నేతలతో అతడికి సంబంధాలున్నట్లు ఎన్ఐఏ అధికారులు గుర్తించారు.
పాకిస్థాన్‌కు చెందిన ఆయుధాల స్మగ్లర్ హాజీ సలీం కేరళ మీదుగా శ్రీలంకకు ఆయుధాలను రవాణా చేసేందుకు ఈ ఆదిలింగం సహకరించినట్లు అధికారులు గుర్తించారు. శ్రీలంకలోని ఎల్టీటీఈ ఉగ్రవాద సంస్థకు కొత్త నిఘాను అందిస్తూనే ఈ మారణాయుధాల స్మగ్లింగ్‌లో ఆదిలింగం కీలకపాత్ర పోషిస్తున్నాడని ఎన్ఐఏ అధికారులు చెబుతున్నారు. ఈ అంశాలన్నింటిని పరిగణనలోకి తీసుకుని కేంద్ర నిఘా విభాగం అధికారులు రాష్ట్రవ్యాప్తంగా ముమ్మర నిఘా కొనసాగిస్తున్నారు. ముఖ్యంగా శ్రీలంక తమిళులు నివసించే ప్రాంతాలు, శ్రీలంక శరణార్థులు నివసించే పునరావాస కేంద్రాలపై నిఘా ముమ్మరం చేశారు. చెన్నై, తిరుచ్చి, కోయంబత్తూరు, మధురై తదితర నగరాలకు చెందిన యువకులను ఎల్టీటీఈలో సభ్యులుగా చేర్చుకునేందుకు ఆదిలింగం, అతని అనుచరులు తీవ్రంగా ప్రయత్నించారని కేంద్ర నిఘా విభాగం సీనియర్ అధికారులు తెలిపారు. ఈ సమాచారంపై రాష్ట్ర ఇంటెలిజెన్స్ విభాగం అధికారులకు కూడా సమాచారం అందించి అప్రమత్తం చేశారు. దీంతో రాష్ట్ర వ్యాప్తంగా కేంద్ర, రాష్ట్ర నిఘా విభాగాల అధికారులు, క్యూ బ్రాంచ్ పోలీసులు, కోస్టల్ సెక్యూరిటీ ఫోర్స్ సభ్యులు ముమ్మర నిఘా నిర్వహిస్తున్నారు.
నవీకరించబడిన తేదీ – 2023-08-27T08:31:57+05:30 IST
