కేంద్ర ప్రభుత్వం ప్రతిపాదించిన జాతీయ విద్యా విధానాన్ని రాష్ట్రంలో నిర్వీర్యం చేస్తోందని విద్యార్థుల తల్లిదండ్రులు ఆవేదన వ్యక్తం చేస్తున్నారు. ఎన్ఈపీ అమలులో భాగంగా రాష్ట్ర ప్రభుత్వం ఈ విద్యా సంవత్సరం నుంచి డిగ్రీ స్థాయిలో కొత్త విధానంలో కోర్సులను ప్రారంభించింది.
-
10 మంది కంటే తక్కువ విద్యార్థులు ఉంటే కళాశాల లేదా కోర్సులను మార్చండి
-
ప్రధానోపాధ్యాయులతో సమావేశంలో కమిషనర్ ఆదేశాలు
(రాయచోటి-ఆంధ్రజ్యోతి) : కేంద్ర ప్రభుత్వం ప్రతిపాదించిన జాతీయ విద్యా విధానాన్ని రాష్ట్రంలో (ఏపీ ప్రభుత్వం) నిర్వీర్యం చేస్తున్నారని విద్యార్థుల తల్లిదండ్రులు ఆవేదన వ్యక్తం చేస్తున్నారు. ఎన్ఈపీ అమలులో భాగంగా రాష్ట్ర ప్రభుత్వం ఈ విద్యా సంవత్సరం నుంచి డిగ్రీ స్థాయిలో కొత్త విధానంలో కోర్సులను ప్రారంభించింది. ఈ మేరకు ఆన్‌లైన్ విధానంలో డిగ్రీలో అడ్మిషన్లు ప్రారంభమయ్యాయి. రాష్ట్రవ్యాప్తంగా చాలా డిగ్రీ కాలేజీల్లో ముఖ్యమైన కోర్సుల్లో కేవలం ఆరుగురు విద్యార్థులు మాత్రమే చేరుతున్నారు. కొన్ని చోట్ల ఇద్దరు ముగ్గురు మాత్రమే ఉన్నారు. పది మందిలోపు విద్యార్థులున్న కాలేజీలు అసంఖ్యాకంగా ఉన్నాయి. రాష్ట్రంలో ఇంజినీరింగ్ కౌన్సెలింగ్ పూర్తికాకపోవడమే విద్యార్థులు డిగ్రీలో ప్రవేశం పొందకపోవడానికి ప్రధాన కారణమని డిగ్రీ కాలేజీల యాజమాన్యాలు పేర్కొంటున్నాయి. ఈ నేపథ్యంలో బుధవారం రాష్ట్ర స్థాయిలో ప్రభుత్వ డిగ్రీ కళాశాలల ప్రిన్సిపాళ్లతో కళాశాల విద్యాశాఖ కమిషనర్ వీడియో కాన్ఫరెన్స్ ద్వారా సమావేశం నిర్వహించారు. ఈ సందర్భంగా కళాశాలల్లో విద్యార్థుల ప్రవేశాలపై చర్చ జరిగిన విషయం తెలిసిందే. రాష్ట్రవ్యాప్తంగా ఉన్న కాలేజీల్లో ఏ కోర్సులో 10 మందిలోపు విద్యార్థులు ఉంటే వారిని మరో కాలేజీకి బదిలీ చేయాలని మౌఖిక ఆదేశాలు ఇచ్చినట్లు సమాచారం. లేని పక్షంలో అదే కళాశాలలో మరో కోర్సుకు మార్చుకోవాలని సూచించారు. దీంతో విద్యార్థుల తల్లిదండ్రులు ఆందోళన చెందుతున్నారు.
ఇష్టమైన గ్రూపుల్లో చేరితే మధ్యలో ఇలా చేస్తే తమ పిల్లలు నష్టపోతారని ఆవేదన వ్యక్తం చేస్తున్నారు. దీనికి తోడు తమకు అనువైన కళాశాలలకు కాకుండా ఇతర కళాశాలలకు మారితే ఇబ్బందులు తప్పవని వాపోతున్నారు. ఎంసెట్ ఫలితాలు వచ్చి నెలలు గడుస్తున్నా ఇంజినీరింగ్ కౌన్సెలింగ్ సకాలంలో పూర్తి చేయకపోవడంతో ఈ పరిస్థితి తలెత్తిందని పేర్కొంటున్నారు. సాధారణంగా ప్రభుత్వం ఫీజు రీయింబర్స్ మెంట్ ఇస్తుండటంతో ఎక్కువ మంది విద్యార్థులు ఇంజినీరింగ్ పై ఆసక్తి చూపుతున్నారు. అక్కడ సీట్లు రాకపోతే మాత్రం డిగ్రీలో చేరేందుకు సిద్ధమవుతున్నారు. అయితే ఇప్పటి వరకు మొదటి దశ ఇంజినీరింగ్ కౌన్సెలింగ్ మాత్రమే పూర్తయింది. ఇంకా చాలా మంది ఇంజినీరింగ్ సీట్ల కోసం ఎదురుచూస్తున్నారు. ఈ పరిస్థితుల్లో ప్రస్తుతం ఆయా కోర్సుల్లో చేరిన విద్యార్థులను మరో కోర్సుకు మార్చాలని, 10 మందిలోపు విద్యార్థులు చేరినందున కళాశాలలను మార్చాలని కోరడం దారుణమని తల్లిదండ్రులు, విద్యార్థులు పేర్కొంటున్నారు. NEP విధానంలో మొదటి సంవత్సరం అయినందున తక్కువ మంది విద్యార్థులు ఉన్నప్పటికి ఈ విషయంపై ఉన్నతాధికారులు పునరాలోచించి కోర్సులను యథావిధిగా నిర్వహించేలా చూడాలని అభ్యర్థించారు. విద్యార్థులు లేరనే సాకుతో కోర్సులను మూసివేస్తే రేషనలైజేషన్ పేరుతో తమ పోస్టులను కూడా కోల్పోయే ప్రమాదం ఉందని ఉపాధ్యాయులు ఆందోళన వ్యక్తం చేస్తున్నారు. ఈ నేపథ్యంలో రాష్ట్రంలోని డిగ్రీ కళాశాలల్లో ఒక్కో కోర్సులో పది మందికి పైగా విద్యార్థులను చేర్పించే పనిలో ప్రిన్సిపాళ్లు, ఉపాధ్యాయులు నిమగ్నమయ్యారు.
నవీకరించబడిన తేదీ – 2023-09-01T10:55:50+05:30 IST
