టమోటా ధరలు: ఎంత పని చేశావు.. నిన్నటిదాకా డబ్బు.. ఇప్పుడు కన్నీళ్లు

ఓడలు బండ్లు అవుతాయి.. బండ్లు ఓడలవుతాయి అంటారు కొందరు. ఇది మనుషులకే కాదు కూరగాయలకు కూడా వర్తిస్తుందని కొందరు ప్రస్తుతం చర్చించుకుంటున్నారు. మొన్నటి వరకు లాభసాటిగా ఉన్న టమాటా రైతులకు కన్నీళ్లు తెప్పిస్తోంది. 30 రోజుల క్రితం వరకు కిలో టమాట రూ.300లకు పైగా పలికేది. అయితే ఇప్పుడు టమాటా ధరలు పాతాళానికి పడిపోయాయి. ఏపీలోని మదనపల్లి మార్కెట్‌లో కిలో టమాటా రూ.9 మాత్రమే ఉండడంతో లాభం లేదని రైతులు వాపోతున్నారు. టమోటాతో కోటీశ్వరులుగా మారిన కొందరు రైతులను చూసి సంతోషించిన వారికి ఇప్పుడు తాజా పరిస్థితి బాధ కలిగిస్తోంది.

ముఖ్యంగా వారం రోజుల్లోనే టమాటా ధరలు భారీగా పడిపోయాయి. ఉత్తరాది రాష్ట్రాల్లో డిమాండ్ తగ్గుముఖం పట్టడంతోపాటు పొరుగున ఉన్న నేపాల్ నుంచి టమాటా దిగుమతులు జరుగుతున్న నేపథ్యంలో టమాటా ధరలు ఒక్కసారిగా తగ్గుముఖం పట్టాయని నిపుణులు అభిప్రాయపడుతున్నారు. ప్రస్తుతం హైదరాబాద్‌లో బహిరంగ మార్కెట్‌లో నాలుగు కిలోలు రూ.100కు విక్రయిస్తున్నారు. కిలో మాత్రమే కొనుగోలు చేసే వారి నుంచి వ్యాపారులు రూ.30 వసూలు చేస్తున్నారు. ఇతర రాష్ట్రాల్లో కిలో టమాటా రూ.20 నుంచి రూ.30 వరకు పలుకుతోంది. కర్ణాటకలోని మైసూరులో కిలో టమాటా రూ.18 వరకు విక్రయిస్తున్నారు. అయితే రానున్న కాలంలో టమాటా ధరలు మరింత తగ్గే అవకాశం ఉందని అంచనా వేస్తున్నారు.

ఇది కూడా చదవండి: వైరల్ వీడియో: పెళ్లి విందులో విందును ఎంజాయ్ చేస్తున్న అతిథులు.. ఏం జరిగిందో చూస్తే షాక్ అవుతారు!

రెండు నెలల క్రితం సంప్రదాయబద్ధంగా టమోటా సాగుచేస్తున్న కొందరు రైతులు ధనవంతులయ్యారు. చరిత్రలో ఎన్నడూ లేని విధంగా కిలో టమాటా రూ.250, రూ.300 వరకు పలుకడంతో ప్రజలు ఆశ్చర్యానికి గురయ్యారు. టమాటా కొనడం, వండడం మానేశారు. కొందరు వ్యాపారులు టమాటా అమ్మేందుకు సెక్యూరిటీ గార్డులను కూడా ఏర్పాటు చేసి.. సోషల్ మీడియాలో వైరల్‌గా మారడం గమనించాం. ఒక్కో టమాటా రూ.30 ధర పలుకుతున్న కొద్దిరోజులకే కిలో టమాట అదే ధరకు రావడం గమనార్హం. ఎంతో ఆశతో టమాటా పంటలు వేసిన రైతులకు లాభం లేకుండా పోతోంది. టమోటా ఎంత పనిచేసిందోనని ఆందోళన చెందుతున్నారు.

నవీకరించబడిన తేదీ – 2023-09-01T16:31:24+05:30 IST