చైనా వేదికగా జరుగుతున్న ఆసియా క్రీడల్లో భారత్ చరిత్ర సృష్టించింది. ఆసియా క్రీడల చరిత్రలో తొలిసారి 100 పతకాలు సాధించింది. మహిళల కబడ్డీలో స్వర్ణం సాధించడం ద్వారా భారత జట్టు ఈ మార్కును సాధించింది.
హాంగ్జౌ: చైనా వేదికగా జరుగుతున్న ఆసియా క్రీడల్లో భారత్ చరిత్ర సృష్టించింది. ఆసియా క్రీడల చరిత్రలో తొలిసారి 100 పతకాలు సాధించింది. మహిళల కబడ్డీలో స్వర్ణం సాధించడం ద్వారా భారత జట్టు ఈ మార్కును సాధించింది. చివరి పోరులో చైనా జట్టును ఓడించి భారత మహిళల జట్టు స్వర్ణం సాధించింది. ఉత్కంఠభరితంగా సాగిన ఫైనల్లో భారత్ 26-25తో విజయం సాధించింది. తొలి 20 నిమిషాల్లో భారత జట్టు 14-9తో ఆధిక్యంలో నిలిచింది. అయితే ద్వితీయార్థంలో చైనా ఆటగాళ్లు రాణించడంతో 39 నిమిషాలు ముగిసే సరికి ఇరు జట్లు 24-24తో సమంగా నిలిచాయి. చివరి నిమిషంలో మన అమ్మాయిలు ఒత్తిడిని అధిగమించడంతో భారత్ 26-25తో ఆధిక్యంలో నిలిచింది. విజయం మనదే. ఈసారి ఆసియా క్రీడల్లో 100 పతకాలు సాధించడమే లక్ష్యంగా భారత్ రంగంలోకి దిగిన సంగతి తెలిసిందే. దీంతో అనుకున్న లక్ష్యం నెరవేరింది.
శుక్రవారం వరకు భారత్ 95 పతకాలు సాధించింది. ఇప్పటికే ఈరోజు మరో 5 పతకాలు సాధించింది. ఆర్చరీలో 4 పతకాలు సాధించారు. ఆర్చరీ మహిళల విభాగంలో తెలుగుకు చెందిన జ్యోతి సురేఖ బంగారు పతకం సాధించింది. జ్యోతి ఆర్చరీ కాంపౌండ్ వ్యక్తిగత ఫైనల్లో దక్షిణ కొరియాకు చెందిన సో చే-విన్‌పై గెలిచింది. హోరాహోరీగా సాగిన ఫైనల్లో జ్యోతి 149-145తో విజయం సాధించింది. ఈ ఆసియా క్రీడల్లో జ్యోతికి తాజా పతకం మూడోది. ఇప్పటికే కాంపౌండ్ ఉమెన్స్ టీమ్, కాంపౌండ్ మిక్స్ డ్ టీమ్ విభాగాల్లో పతకాలు సాధించింది. అలాగే ఆర్చరీ కాంపౌండ్ వ్యక్తిగత విభాగంలో అదితి గోపీచంద్ ఈరోజు కాంస్య పతకాన్ని గెలుచుకుంది. మరోవైపు పురుషుల ఆర్చరీ విభాగంలో కూడా ఓజాస్ డియోటెల్ స్వర్ణం సాధించాడు. ఇదే విభాగంలో అభిషేక్ రజతం సాధించాడు. దీంతో ఆసియా క్రీడల్లో ఇప్పటివరకు భారత్ సాధించిన పతకాల సంఖ్య 100కి చేరగా.. అందులో 25 స్వర్ణాలు, 35 రజతాలు, 40 కాంస్య పతకాలు ఉన్నాయి. ప్రస్తుతం పతకాల పట్టికలో భారత్ నాలుగో స్థానంలో ఉంది. గతంలో ఇండోనేషియా వేదికగా జరిగిన ఆసియా క్రీడల్లో భారత్ 70 పతకాలు సాధించిన సంగతి తెలిసిందే. ఈసారి ఆ రికార్డును బద్దలు కొట్టడమే కాకుండా 100 పతకాలు సాధించి సరికొత్త చరిత్ర సృష్టించింది.
నవీకరించబడిన తేదీ – 2023-10-07T09:21:09+05:30 IST
