ప్రస్తుతం కర్ణాటకలో ‘పులిగోరు’ వివాదం నడుస్తోంది. బిగ్ బాస్ కంటెస్టెంట్ వర్తూరు సంతోష్ పులి పంజాతో కనిపించడంతో.. అప్పటి నుంచి ఈ వివాదం తెరపైకి వచ్చింది. కన్నడ సెలబ్రిటీలు ఒకరి తర్వాత ఒకరు ఈ వివాదంలో చిక్కుకుంటున్నారు. గతంలో వీరు పులి గోళ్లను ధరించిన వీడియోలు, ఫోటోలు ఇప్పుడు వైరల్ అవుతున్నాయి. దీంతో వారిపై చర్యలు తీసుకోవాలన్న డిమాండ్ల నేపథ్యంలో అటవీశాఖ అధికారులు రంగంలోకి దిగారు.
ఇప్పుడు ఈ వ్యవహారంలో కన్నడ స్టార్ నటుడు దర్శన్ కూడా చిక్కుకున్నారు. ఇటీవల ఓ ఆలయాన్ని సందర్శించిన సందర్భంగా దర్శన్ పులి పంజా ధరించి కనిపించాడు. అందుకు సంబంధించిన ఫోటోలు నెట్లో హల్చల్ చేస్తున్నాయి. దీంతో శ్రీనివాస్ అనే కార్యకర్త దర్శన్పై అటవీశాఖ అధికారులకు ఫిర్యాదు చేశాడు. ఆయన ఫిర్యాదు మేరకు అధికారులు వెంటనే రంగంలోకి దిగి దర్శన్ ఇంట్లో సోదాలు చేశారు. దర్శన్ ఇంట్లోనే కాదు.. పులి పంజా ధరించినట్లు సమాచారం అందిన ప్రతి ఒక్కరి ఇళ్లలోనూ అధికారులు సోదాలు నిర్వహించారు. ఈ క్రమంలో బెంగళూరులోని శ్రీనివాస్ నివాసంలో సోదాలు నిర్వహించగా పులి పంజా లాంటి పదార్థం లభించింది. దీనిని పరీక్షల నిమిత్తం ఫోరెన్సిక్ సైన్స్ లేబొరేటరీకి పంపారు.
దర్శన్ మాత్రమే కాదు.. జేడీఎస్ నేత & నటుడు నిఖిల్ కుమారస్వామి, బీజేపీ రాజ్యసభ ఎంపీ జగ్గేష్, నిర్మాత రాక్లైన్ వెంకటేష్, జ్యోతిష్యుడు వినయ్ గురూజీ కూడా ఈ వివాదంలో చిక్కుకున్నారు. అయితే తాను వేసుకున్నది ఫేక్ టైగర్ పంజా అని, అది పెళ్లి సమయంలో ఎవరో తనకు ఇచ్చారని, కావాలంటే అధికారులు చెక్ చేసుకోవచ్చని నిఖిల్ చెప్పాడు. అలాగే.. ఎంపీ జగ్గేష్ కు సంబంధించి రెండేళ్ల కిందటి వీడియో వైరల్ అవుతోంది. తన 20వ పుట్టినరోజు సందర్భంగా తన తల్లి తనకు పులిని బహుమతిగా ఇచ్చిందని చెప్పాడు. అయితే దీనిపై ఆయన ఇంకా స్పందించలేదు. ఈ వివాదంలో దర్శన్తో పాటు ఇతర సెలబ్రిటీలు ఇప్పటి వరకు మాట్లాడలేదు.
కాగా, వన్యప్రాణుల సంరక్షణ చట్టం 1972 ప్రకారం వన్యప్రాణులను చంపడం, వాటి గోళ్లు, చర్మాలు, కొమ్ములు వంటివి కలిగి ఉండటం నేరం కాగా.. ఈ చట్టం ప్రకారం.. పులి పంజా ధరించడం కూడా చట్టవిరుద్ధం. అందుకే పులి గోళ్లు ధరించిన వారిపై కఠిన చర్యలు తీసుకునేందుకు అటవీశాఖ అధికారులు సిద్ధమవుతున్నారు. నేరం చేస్తే ఉపేక్షించేది లేదని కర్ణాటక అటవీ శాఖ మంత్రి ఈశ్వర్ ఖండ్రే అన్నారు.
నవీకరించబడిన తేదీ – 2023-10-25T23:00:46+05:30 IST
