దత్తాజీరావు గైక్వాడ్‌: టీమిండియా వృద్ధ క్రికెటర్‌ కన్నుమూశారు

దేశంలోనే అత్యంత వృద్ధ టెస్టు క్రికెటర్‌గా రికార్డు సృష్టించిన భారత మాజీ కెప్టెన్ దత్తాజీ రావ్ గైక్వాడ్ ఇక లేరు. వృద్ధాప్య సమస్యల కారణంగా 95 ఏళ్ల వయసులో బరోడాలోని తన నివాసంలో మరణించారు. తాజాగా దత్తాజీరావు 12 రోజుల పాటు ఐసీయూలో ఉన్నారని ఓ జాతీయ మీడియా పేర్కొంది. 1952 నుంచి 1961 మధ్య 9 ఏళ్ల పాటు భారత జట్టుకు ప్రాతినిధ్యం వహించిన గైక్వాడ్ 11 టెస్టు మ్యాచ్‌లు ఆడాడు. 4 టెస్టుల్లో టీమిండియాకు కెప్టెన్‌గా వ్యవహరించాడు. దత్తాజీ రావ్ గైక్వాడ్ 1952లో లీడ్స్‌లో ఇంగ్లండ్‌తో జరిగిన టెస్ట్ మ్యాచ్‌లో అంతర్జాతీయ క్రికెట్‌లోకి అరంగేట్రం చేశాడు. అతను 1961లో చెన్నైలో పాకిస్థాన్‌తో తన చివరి టెస్టు ఆడాడు. దత్తాజీ తన అంతర్జాతీయ టెస్టు కెరీర్‌లో హాఫ్ సెంచరీ సాధించాడు.

దత్తాజీ ఫస్ట్ క్లాక్ క్రికెట్‌లో బరోడా జట్టుకు ప్రాతినిధ్యం వహించాడు మరియు 110 మ్యాచ్‌లలో 36 సగటుతో 5788 పరుగులు చేశాడు. ఇందులో 17 సెంచరీలు, 23 హాఫ్ సెంచరీలు ఉన్నాయి. అత్యధిక వ్యక్తిగత స్కోరు 249 నాటౌట్. బౌలింగ్‌లో 25 వికెట్లు తీశాడు. అతను 1947 నుండి 1964 వరకు ఫస్ట్ క్లాస్ క్రికెట్ ఆడాడు.మొత్తం 17 సంవత్సరాల పాటు ఫస్ట్ క్లాస్ క్రికెట్ ఆడిన దత్తాజీ బరోడా క్రికెట్ జట్టు ఎదుగుదలకు ఎంతగానో తోడ్పడ్డారు. 2016లో 87 ఏళ్ల వయసులో భారత మాజీ క్రికెటర్ దీపక్ సోధన్ కన్నుమూశారు. ఆ తర్వాత, దత్తాజీరావు గైక్వాడ్ భారతదేశపు అత్యంత వృద్ధ టెస్ట్ క్రికెటర్‌గా గుర్తింపు పొందాడు. దత్తాజీరావు గైక్వాడ్ మృతి పట్ల మాజీ క్రికెటర్లు సంతాపం వ్యక్తం చేశారు. దత్తాజీ రావు కుమారుడు అన్షుమాన్ గైక్వాడ్ కూడా క్రికెటర్. అన్షుమాన్ 1975 మరియు 1987 మధ్య 40 టెస్టులు మరియు 15 ODIలలో టీమ్ ఇండియాకు ప్రాతినిధ్యం వహించాడు.

మరింత క్రీడా వార్తలు కోసం ఇక్కడ క్లిక్ చేయండి

నవీకరించబడిన తేదీ – ఫిబ్రవరి 13, 2024 | 01:27 PM