రోహన్ బోపన్న: చరిత్ర సృష్టించిన భారత టెన్నిస్ దిగ్గజం.. 43 ఏళ్ల వయసులో..

భారత టెన్నిస్ దిగ్గజం రోహన్ బోపన్న చరిత్ర సృష్టించాడు. పురుషుల టెన్నిస్ విభాగంలో నంబర్ వన్ ర్యాంక్‌కు చేరుకున్నాడు. 43 ఏళ్ల వయసులో బోపన్న ప్రపంచ నంబర్ వన్ గా నిలిచి కొత్త చరిత్ర లిఖించాడు. బోపన్న ఆస్ట్రేలియన్ ఓపెన్ సెమీస్‌కు చేరుకోవడం ద్వారా టాప్ ర్యాంక్‌కు చేరుకున్నాడు. దీంతో టెన్నిస్ చరిత్రలో అత్యధిక వయసులో నంబర్ వన్ ర్యాంక్ సాధించిన తొలి ఆటగాడిగా నిలిచాడు. దీంతో గతంలో అమెరికాకు చెందిన రాజీవ్ రామ్ పేరిట ఉన్న రికార్డును బోపన్న బద్దలు కొట్టాడు. కాగా, రాజీవ్ రామ్ 38 ఏళ్ల వయసులో ప్రపంచ నంబర్ వన్‌గా నిలిచాడు. అయితే ఈ ర్యాంకులు ఇంకా అధికారికంగా ప్రకటించబడలేదు. ప్రస్తుతం ఆస్ట్రేలియన్ ఓపెన్ గ్రాండ్ స్లామ్ జరుగుతోంది. ఆస్ట్రేలియన్ ఓపెన్ ముగిసిన తర్వాత ఈ ర్యాంక్‌లను అధికారికంగా ప్రకటిస్తారు. 20 ఏళ్ల టెన్నిస్ కెరీర్‌లో నంబర్ వన్ ర్యాంక్ సాధించడం బోపన్నకు ఇదే తొలిసారి కావడం గమనార్హం. అంతేకాదు ఈ ఘనత సాధించిన నాలుగో భారత టెన్నిస్ ప్లేయర్‌గా బోపన్న నిలిచాడు. బోపన్న కంటే ముందు లియాండర్ పేస్, మహేశ్ భూపతి, సానియా మీర్జా ప్రపంచ నంబర్ వన్‌గా నిలిచారు.

కాగా బోపన్న ఆస్ట్రేలియన్ ఓపెన్ డబుల్స్ బరిలోకి దిగకముందు మూడో ర్యాంక్‌లో ఉన్నాడు. ఈ గ్రాండ్‌స్లామ్‌లో బోపన్న మాథ్యూ ఎబ్డెన్‌తో కలిసి బరిలోకి దిగాడు. టోర్నీలో వరుస విజయాలతో దూసుకెళ్తున్న ఈ జోడీ సెమీస్ కు దూసుకెళ్లింది. బుధవారం జరిగిన క్వార్టర్ ఫైనల్ మ్యాచ్‌లో బోపన్న జోడీ 6-4, 7-6తో అర్జెంటీనాకు చెందిన మాక్సిమో గొంజాలెజ్, ఆండ్రూ మోల్టెని జంటపై వరుస సెట్లలో విజయం సాధించింది. ఈ సెట్ గంటా 46 నిమిషాల పాటు సాగింది. ఈ విజయంతో మాథ్యూ ఎబ్డెన్ కూడా తన ర్యాంక్‌ను మెరుగుపరుచుకున్నాడు. మాథ్యూ ఎబ్డెన్ రెండో ర్యాంక్‌కు చేరుకున్నాడు. ఆస్ట్రేలియన్ ఓపెన్ సెమీస్ చేరడం బోపన్నకు ఇదే తొలిసారి కావడం గమనార్హం. బోపన్న ఇప్పటి వరకు 17 సార్లు ఆస్ట్రేలియన్ ఓపెన్‌కు హాజరయ్యాడు. గతేడాది యూఎస్ ఓపెన్ లో బోపన్న జోడీ ఫైనల్ కు చేరిన సంగతి తెలిసిందే. దీంతో గ్రాండ్‌స్లామ్‌ ఫైనల్‌ చేరిన అత్యంత వయోవృద్ధ ఆటగాడిగా బోపన్న చరిత్ర సృష్టించాడు.

మరింత క్రీడా వార్తలు కోసం ఇక్కడ క్లిక్ చేయండి

నవీకరించబడిన తేదీ – జనవరి 24, 2024 | 11:56 AM