మణిపూర్ ఘటనపై ఎన్‌సీడబ్ల్యూ సీరియస్ మణిపూర్ ఘటనపై ఎన్‌సీడబ్ల్యూ సీరియస్ అయింది

చర్యలు తీసుకోవాలని డీజీపీకి ఆదేశాలు

ఆ వీడియోలను తొలగించాలని ట్విట్టర్‌కు నోటీసులు

న్యూఢిల్లీ, జూలై 20: మణిపూర్‌లో ఇద్దరు మహిళలపై జరిగిన అకృత్యాలను జాతీయ మహిళా కమిషన్ (NCW) ఖండించింది. ఈ ఘటనను సీరియస్‌గా పరిగణించిన కమిషన్‌.. సుమోటోగా విచారణ జరుపుతున్నట్టు ట్వీట్‌ చేసింది. ఈ ఘటనపై వెంటనే చర్యలు తీసుకోవాలని ఆ రాష్ట్ర డీజీపీని ఆదేశించింది. ఈ ఘటనపై మణిపూర్ డీజీపీతో మాట్లాడినట్లు ఎన్‌సీడబ్ల్యూ చైర్‌పర్సన్ రేఖా శర్మ తెలిపారు. అలాగే బాధితుల ఊరేగింపుకు సంబంధించిన వీడియోలను ట్విట్టర్ నుంచి తొలగించాలని ఎన్‌సీడబ్ల్యూ నోటీసులు జారీ చేసింది. ఈ ఘటనపై సీఎం బీరెన్ సింగ్‌తో మాట్లాడినట్లు కేంద్ర మహిళా శిశు సంక్షేమ శాఖ మంత్రి స్మృతి ఇరానీ తెలిపారు. నిందితులను ఎట్టి పరిస్థితుల్లో వదిలిపెట్టబోమన్నారు.

ప్రధానికి స్వాతి మలివాల్ లేఖ

ఈ ఘటనపై ఢిల్లీ మహిళా కమిషన్ (డీసీడబ్ల్యూ) చీఫ్ స్వాతి మలివాల్ స్పందించారు. ఆ వీడియోలు చూసినప్పటి నుంచి అతనికి నిద్ర పట్టడం లేదు. మణిపూర్‌లో పరిస్థితిపై తీవ్ర ఆందోళన వ్యక్తం చేశారు. ఘటన జరిగి రెండున్నర నెలలు కావస్తున్నా నిందితులను పట్టుకోకపోవడంపై మండిపడ్డారు. మణిపూర్‌లో హింసాత్మక ఘటనలను అరికట్టేందుకు తక్షణ చర్యలు తీసుకోవాలని ప్రధాని మోదీకి లేఖ రాసినట్లు ఆమె వెల్లడించారు.

బెంగళూరులో కాంగ్రెస్ ధర్నా

బెంగళూరు, జూలై 20 (ఆంధ్రజ్యోతి): మణిపూర్ బాధితులకు సంఘీభావం తెలుపుతూ కాంగ్రెస్ కార్యకర్తలు బెంగళూరులోని గాంధీ విగ్రహం ఎదుట గురువారం ధర్నా నిర్వహించారు. దీనికి నైతిక బాధ్యత వహిస్తూ ప్రధాని మోదీ తన పదవికి రాజీనామా చేయాలని డిమాండ్‌ చేశారు. బీజేపీ అధికారంలో ఉన్నందునే మణిపూర్ దురాగతాలపై ప్రధాని మాట్లాడడం లేదని విమర్శించారు.

నవీకరించబడిన తేదీ – 2023-07-21T03:35:27+05:30 IST