యావజ్జీవ కారాగార శిక్ష అనుభవిస్తున్న జమ్మూ కాశ్మీర్ లిబరేషన్ ఫ్రంట్ (జేకేఎల్‌ఎఫ్) చీఫ్ యాసిన్ మాలిక్ శుక్రవారం సుప్రీంకోర్టులో ఆశ్చర్యకరమైన ప్రవేశం చేశారు. తన కేసును తానే వాదిస్తానని చెప్పి బెంచ్ ముందుకు వచ్చారు. ఈ ఘటనపై న్యాయమూర్తులు ఆశ్చర్యపోయారు.
కోర్టు ముందు స్వయంగా వాదిస్తూ..
జైలు నుంచి ఎలా బయటపడ్డావు?
న్యూఢిల్లీ, జూలై 21: యావజ్జీవ కారాగార శిక్ష అనుభవిస్తున్న జమ్మూ కాశ్మీర్ లిబరేషన్ ఫ్రంట్ (జేకేఎల్‌ఎఫ్) చీఫ్ యాసిన్ మాలిక్ శుక్రవారం సుప్రీంకోర్టులో ఆశ్చర్యకరమైన ప్రవేశం చేశారు. తన కేసును తానే వాదిస్తానని చెప్పి బెంచ్ ముందుకు వచ్చారు. ఈ ఘటనపై న్యాయమూర్తులు ఆశ్చర్యపోయారు. ఆదేశాలు ఇవ్వకున్నా ఇలా ఎలా వస్తారని ప్రశ్నించారు. జైలు అధికారులు హైరిస్క్ ఉన్న ఖైదీని ఈ విధంగా ఎలా తీసుకురాగలరని సొలిసిటర్ జనరల్ (ఎస్జీ) కూడా అయోమయంలో పడ్డారు. కోర్టు నుంచి పంపిన లేఖపై అవగాహన లోపం వల్లే ఇదంతా జరిగిందని ఎట్టకేలకు అర్థమైంది. మూడు రోజుల్లో విచారణ జరిపి నివేదిక సమర్పించాలని ఢిల్లీ జైళ్ల శాఖ ఆదేశించింది. యాసిన్ మాలిక్ ప్రస్తుతం తీహార్ జైలులో ఉన్నాడు. 1989లో అప్పటి కేంద్ర హోం మంత్రి ముఫ్తీ మహ్మద్ సయీద్ కుమార్తె రూబియా కిడ్నాప్ కేసులో వ్యక్తిగతంగా హాజరుపరచాలని జమ్మూ కాశ్మీర్‌లోని టాడా ప్రత్యేక కోర్టు సెప్టెంబర్ 20, 2022న ఆదేశించింది. భద్రతా కారణాల దృష్ట్యా ఆయనను భౌతికంగా హాజరుపరచడం సరికాదని సీబీఐ సుప్రీంకోర్టులో అప్పీలు చేసింది. సీబీఐ అప్పీళ్లు విచారణకు రానున్నందున వ్యక్తిగతంగా హాజరయ్యేందుకు తనకు అవకాశం ఇవ్వాలని యాసిన్ మాలిక్ సుప్రీంకోర్టు రిజిస్ట్రార్‌కు లేఖ రాశారు. దీంతో పాటు అఫిడవిట్ కూడా సమర్పించారు. తగిన ఆదేశాల కోసం సంబంధిత ధర్మాసనం ముందు అఫిడవిట్‌ను ఉంచుతామని సుప్రీంకోర్టు అసిస్టెంట్ రిజిస్ట్రార్ ఈ నెల 18న లేఖ రాశారు. అయితే ఈ లేఖను తప్పుగా అర్థం చేసుకున్న జైలు అధికారులు.. కోర్టు అనుమతి ఇచ్చిందని భావించి యాసిన్‌ను కోర్టులో హాజరుపరిచారు. కాగా, కేసు విచారణ నుంచి ఉపసంహరించుకుంటున్నట్లు జస్టిస్ దీపాంకర్ దత్తా ప్రకటించారు. దీంతో కేసును వేరే బెంచ్‌కు పంపాలని జస్టిస్ సూర్యకాంత్ సీజేఐని కోరారు. విచారణను నాలుగు వారాలకు వాయిదా వేసింది. ఇదిలావుండగా, యాసిన్ మాలిక్‌ను కోర్టులో హాజరుపరచడం ద్వారా తీవ్ర భద్రతా లోపాలు చోటుచేసుకున్నాయని తుషార్ మెహతా కేంద్ర హోంశాఖ కార్యదర్శి అజయ్ భల్లాకు లేఖ రాశారు.
నవీకరించబడిన తేదీ – 2023-07-22T01:19:03+05:30 IST
