ఇరాక్‌లో ఘోర అగ్నిప్రమాదం జరిగింది. ఓ వివాహ వేడుకలో జరిగిన అగ్ని ప్రమాదంలో ఇప్పటివరకు 100 మంది చనిపోయారు. 150 మంది గాయపడ్డారు. మృతుల సంఖ్య పెరిగే అవకాశం ఉందని అధికారులు చెబుతున్నారు.
బాగ్దాద్: ఇరాక్‌లో ఘోర అగ్నిప్రమాదం జరిగింది. ఓ వివాహ వేడుకలో జరిగిన అగ్ని ప్రమాదంలో ఇప్పటివరకు 100 మంది చనిపోయారు. 150 మంది గాయపడ్డారు. మృతుల సంఖ్య పెరిగే అవకాశం ఉందని అధికారులు చెబుతున్నారు. దీంతో పెళ్లి వేడుకలో పెను విషాదం నెలకొంది. ఉత్తర ఇరాక్‌లోని నినెవే ప్రావిన్స్‌లోని హమ్దానియాలో జరిగిన క్రైస్తవ వివాహ వేడుకలో ఈ ఘటన చోటుచేసుకుంది. ఇది రాజధాని బాగ్దాద్‌కు వాయువ్యంగా దాదాపు 335 కిలోమీటర్లు (205 మైళ్ళు) దూరంలో ఉన్న మోసుల్ నగరం వెలుపల క్రైస్తవులు ఎక్కువగా ఉండే ప్రాంతం. స్థానిక కాలమానం ప్రకారం మంగళవారం రాత్రి 10:45 గంటల ప్రాంతంలో ఈ ఘటన జరిగింది. ఈ ప్రమాదంలో వధువు కూడా గాయపడినట్లు సమాచారం. పెళ్లి వేడుకలో పెళ్లి మండపంలో పటాకులు పేలినట్లు ప్రాథమిక సమాచారం. “ప్రాథమిక సమాచారం ప్రకారం, వివాహ వేడుకలో బాణాసంచా కాల్చారు. దీంతో హాలులో మంటలు చెలరేగాయి” అని సివిల్ డిఫెన్స్ అధికారులు ఒక ప్రకటనలో తెలిపారు. ఇరాక్‌లో పెళ్లిళ్లలో బాణాసంచా కాల్చడం సర్వసాధారణమని స్థానికులు చెబుతున్నారు.
ప్రమాదం జరిగిన సమయంలో దాదాపు 1000 మంది వివాహ వేడుకకు హాజరైనట్లు తెలుస్తోంది. ఘటన జరిగిన వెంటనే అగ్నిమాపక సిబ్బంది ఘటనాస్థలికి చేరుకుని సహాయక చర్యలు చేపట్టారు. క్షతగాత్రులను స్థానిక ఆసుపత్రులకు తరలించినట్లు ఇరాక్ ఆరోగ్య మంత్రిత్వ శాఖ అధికార ప్రతినిధి సైఫ్ అల్ బదర్ తెలిపారు. “దురదృష్టకర ప్రమాదంలో నష్టపోయిన వారికి సహాయం అందించడానికి అన్ని ప్రయత్నాలు జరుగుతున్నాయి” అని అల్-బాదర్ చెప్పారు. మరోవైపు, అగ్నిప్రమాదంపై విచారణకు ప్రధాని మహ్మద్ షియా అల్-సుదానీ ఆదేశించారు. బాధితులను తక్షణమే ఆదుకోవాలని అధికారులను కోరినట్లు ప్రధానమంత్రి కార్యాలయం ఒక ప్రకటనలో తెలిపింది. గాయపడిన వారిలో కొందరిని ప్రాంతీయ ఆసుపత్రులకు తరలించినట్లు నినెవే ప్రావిన్షియల్ గవర్నర్ నజీమ్ అల్-జుబౌరీ తెలిపారు. మంటలు చెలరేగడంతో మృతుల సంఖ్య పెరిగే అవకాశం ఉందని తెలిపారు.
నవీకరించబడిన తేదీ – 2023-09-27T09:23:09+05:30 IST
