వివాదాస్పద పసిడి.. | వివాదాస్పద పసిడి..

కబడ్డీలో భారత పురుషుల, మహిళల జట్లు పచ్చ పతకాలతో మెరిశాయి. వివాదాస్పద ఫైనల్లో భారత్ 33-29తో డిఫెండింగ్ ఛాంపియన్ ఇరాన్‌ను ఓడించింది. 2018 గేమ్స్ ఫైనల్‌లో ఇరాన్ చేతిలో ఎదురైన ఓటమికి ప్రతీకారం తీర్చుకుంది. మరో 65 సెకన్లలో ఆట ముగుస్తుందనగా.. రైడ్ విషయంలో తలెత్తిన వివాదం కారణంగా దాదాపు గంటపాటు మ్యాచ్‌ను నిలిపివేయాల్సి వచ్చింది. 28-28తో టై అయినప్పుడు రైడ్‌కి వెళ్లిన భారత కెప్టెన్ పవన్ కుమార్.. డిఫెండర్‌ను తాకకుండానే లాబీలోకి వెళ్లాడు. కానీ, ఇరాన్ ఆటగాళ్లు అతడిని కొట్టి బయటకు నెట్టారు. ఇక్కడే ఎన్ని పాయింట్లు ఇస్తారనేది పెద్ద చర్చకు దారితీసింది. తమకు అనుకూలంగా నిర్ణయం తీసుకోవాలని ఇరు జట్లు కోర్టులో నిరసన తెలిపాయి. పాత రూల్ ప్రకారం.. పవన్, అతడిని టచ్ చేసిన ముగ్గురు ఇరాన్ ఆటగాళ్లు ఔట్ అయితే.. భారత్ కు నాలుగు పాయింట్లు, ఇరాన్ కు ఒక పాయింట్ రావాలి. అయితే కొత్త రూల్స్ ప్రకారం ఒక్క పవన్ మాత్రమే అవుట్. ఇక్కడే పాయింట్ల కేటాయింపు అంశం వివాదాస్పదమైంది. చివరకు భారత్‌కు నాలుగు పాయింట్లు, ఇరాన్‌కు ఒక పాయింట్ ఇవ్వాలని అధికారులు నిర్ణయించడంతో మ్యాచ్ మళ్లీ 32-29 వద్ద ప్రారంభమైంది. రైడ్ కోసం వచ్చిన అలీరెజాను నితిన్ పట్టుకున్నాడు. దీంతో భారత్ ఎనిమిదో ఆసియాడ్ స్వర్ణ పతకాన్ని కైవసం చేసుకుంది. మహిళల బంగారు పతక పోరులో భారత్ 26-25తో చైనీస్ తైపీపై విజయం సాధించింది. తొలి అర్ధభాగంలో భారత్ 14-9తో బలమైన స్కోరును ప్రదర్శించినా.. రెండో అర్ధభాగంలో తైపీ ఒత్తిడి పెంచి 24-24తో సమం చేసింది. కానీ, భారత్ చివరి నిమిషంలో తెలివిగా ఆడి గెలిచి దేశానికి 100వ పతకాన్ని అందించింది. 2010లో మహిళల కబడ్డీని ప్రవేశపెట్టినప్పుడు వరుసగా రెండు బంగారు పతకాలు సాధించిన భారత్.. 2018 గేమ్స్‌లో ఇరాన్ చేతిలో ఓడి రజతం సాధించింది.

నవీకరించబడిన తేదీ – 2023-10-08T04:05:32+05:30 IST