ఛత్తీస్గఢ్ అసెంబ్లీ ఎన్నికల తొలి దశలో పోటీ చేస్తున్న 223 మంది అభ్యర్థుల్లో 46 మంది కోటీశ్వరులు. కవార్దా నుంచి పోటీ చేస్తున్న ఆప్ అభ్యర్థి ఖదగ్‌రాజ్ సింగ్ ఆస్తుల విలువ 40 కోట్లకుపైగా ఉంది.
ఆస్తుల్లో ఆప్ అభ్యర్థి అగ్రస్థానం.. 26 మందిపై క్రిమినల్ కేసులు
రాయ్‌పూర్, అక్టోబర్ 28: ఛత్తీస్గఢ్ అసెంబ్లీ ఎన్నికల తొలి దశలో పోటీ చేస్తున్న 223 మంది అభ్యర్థుల్లో 46 మంది కోటీశ్వరులు. కవార్దా నుంచి పోటీ చేస్తున్న ఆప్ అభ్యర్థి ఖదగ్‌రాజ్ సింగ్ ఆస్తుల విలువ 40 కోట్లకుపైగా ఉంది. బీజేపీ అభ్యర్థి భావనా బోహ్రా (33 కోట్లు), కాంగ్రెస్ అభ్యర్థి జతిన్ జైస్వాల్ (16 కోట్లు) తర్వాతి స్థానాల్లో ఉన్నారు. ఛత్తీస్గఢ్ ఎలక్షన్ వాచ్ అండ్ అసోసియేషన్ ఫర్ డెమోక్రటిక్ రిఫార్మ్స్ (ఏడీఆర్) ఈ విషయాన్ని వెల్లడించింది. ప్రధాన పార్టీల్లో బీజేపీ (20) అభ్యర్థుల సగటు ఆస్తి 5.33 కోట్లు, కాంగ్రెస్ (20) అభ్యర్థుల సగటు ఆస్తి 5.27 కోట్లు, ఆప్ (10) అభ్యర్థుల సగటు ఆస్తి 4.45 కోట్లు. డొంగర్‌ఘర్ (ఎస్సీ) నియోజకవర్గం స్వతంత్ర అభ్యర్థి హేమకుమార్ సత్నామీ అత్యల్ప ఆస్తులు (రూ. 8 వేలు) కలిగి ఉన్నారు. అదేవిధంగా భారతీయ శక్తి చేతన్ పార్టీ అభ్యర్థి నరహర్ దేవ్ గాడే (రూ. 10 వేలు), రిపబ్లికన్ పార్టీ (ఖోర్పియా) అభ్యర్థి ప్రతిమా వాస్నిక్ (రూ. 10 వేలు) తక్కువ ఆస్తులు కలిగి ఉన్నారు. కాగా, ఛత్తీస్గఢ్ అసెంబ్లీ ఎన్నికల్లో తొలి దశలో పోటీ చేస్తున్న అభ్యర్థుల్లో 26 మందిపై క్రిమినల్ కేసులు ఉన్నాయి. ఆ 26 మంది అభ్యర్థుల్లో 16 మందిపై తీవ్రమైన అభియోగాలు ఉన్నాయి. క్రిమినల్ కేసులు ఎదుర్కొంటున్న వారిలో బీజేపీకి చెందిన ఐదుగురు, కాంగ్రెస్‌కు చెందిన ఇద్దరు, ఆప్‌కు చెందిన నలుగురు, జనతా కాంగ్రెస్ ఛత్తీస్‌గఢ్‌కు చెందిన ముగ్గురు అభ్యర్థులు ఉన్నారు. 90 స్థానాలున్న ఛత్తీస్గఢ్ అసెంబ్లీలో తొలి దశలో 20 స్థానాలకు నవంబర్ 7న ఎన్నికలు జరగనున్నాయి. రెండో దశలో మరో 70 స్థానాలకు నవంబర్ 17న ఎన్నికలు జరగనున్నాయి.
నవీకరించబడిన తేదీ – 2023-10-30T04:44:01+05:30 IST
