వన్డే ప్రపంచకప్: ఇంగ్లండ్‌కు ఇంకా సెమీస్ అవకాశాలు ఉన్నాయి.. అంతా ఇలాగే జరగాలి..!!

వన్డే ప్రపంచకప్‌లో డిఫెండింగ్‌ ఛాంపియన్‌గా బరిలోకి దిగిన ఇంగ్లండ్‌ ఘోరంగా రాణిస్తోంది. తొలి మ్యాచ్‌లో న్యూజిలాండ్ చేతిలో ఓడిన ఆ జట్టు ఆఫ్ఘనిస్థాన్ చేతిలో ఓడి సెమీఫైనల్ అవకాశాలను తగ్గించుకుంది. అక్కడి నుంచి పరాజయాల పరంపర కొనసాగుతోంది. దక్షిణాఫ్రికా, శ్రీలంక, భారత్ చేతిలో ఓడింది. ఇప్పటి వరకు ఆరు మ్యాచ్‌లు ఆడిన ఇంగ్లండ్‌ ఒక్క మ్యాచ్‌లో మాత్రమే విజయం సాధించింది. బంగ్లాదేశ్‌పై మాత్రమే ఇంగ్లండ్ విజయం సాధించింది. అయితే సాంకేతికంగా ఇంగ్లండ్‌కు సెమీస్‌కు చేరే అవకాశం ఇంకా ఉందని క్రికెట్ విశ్లేషకులు అభిప్రాయపడుతున్నారు. వచ్చే మూడు మ్యాచ్‌ల్లో ఇంగ్లండ్‌ అద్భుతంగా గెలిస్తే ప్రస్తుతం 3, 4, 5 స్థానాల్లో ఉన్న జట్లు అన్ని మ్యాచ్‌ల్లోనూ ఓడిపోతే సెమీస్‌కు అవకాశం ఉంటుందని వివరించారు.

మెగా టోర్నీలో ఇంగ్లండ్ ఇంకా మూడు మ్యాచ్‌లు ఆడాల్సి ఉంది. ఇంగ్లండ్ నవంబర్ 4న ఆస్ట్రేలియాతో, నవంబర్ 8న నెదర్లాండ్స్‌తో, నవంబర్ 11న పాకిస్థాన్‌తో తలపడనుంది. ప్రస్తుత ఫామ్‌లో ఆస్ట్రేలియాపై గెలవాలంటే బట్లర్ జట్టు అద్భుతంగా ఆడాలి. నెదర్లాండ్స్‌పై గెలిచినా.. పాకిస్థాన్‌పై గెలవడం అంత ఈజీ కాదు. పాకిస్థాన్ కూడా దాదాపు ఇంగ్లండ్ పరిస్థితిలోనే ఉంది. ఈ మ్యాచ్ ఇరు జట్లకు కీలకం కానుంది. మరోవైపు పాయింట్ల పట్టికలో మూడు, నాలుగు స్థానాల్లో ఉన్న న్యూజిలాండ్, ఆస్ట్రేలియాలు చెరో 8 పాయింట్లతో ఉన్నాయి. న్యూజిలాండ్ నవంబర్ 1న దక్షిణాఫ్రికాతో, నవంబర్ 4న పాకిస్థాన్‌తో, నవంబర్ 9న శ్రీలంకతో ఆడుతుంది. అలాగే ఆస్ట్రేలియా నవంబర్ 4న ఇంగ్లండ్‌తో, నవంబర్ 7న ఆఫ్ఘనిస్తాన్‌తో, నవంబర్ 11న బంగ్లాదేశ్‌తో తలపడుతుంది. ఈ మూడింటిలో రెండింటిలో ఆస్ట్రేలియా గెలిచే అవకాశం కనిపిస్తోంది. . దీంతో ఆ జట్టు పాయింట్ల పట్టికలో మూడో స్థానంలో నిలిచే అవకాశం ఉంది. నాలుగో స్థానం కోసం ఇంగ్లండ్ తీవ్రంగా పోరాడాల్సి ఉంటుంది. ఒకరకంగా చెప్పాలంటే మెగా టోర్నీలో ఇంగ్లండ్‌కు ఆస్ట్రేలియాతో జరిగే మ్యాచ్‌ దిగ్విజయం కానుంది.

నవీకరించబడిన తేదీ – 2023-10-30T21:33:49+05:30 IST