ఎవరికి? ఎవరికి??

• జూబ్లీహిల్స్ నుంచి మజ్లిస్ పోటీ

• ఓట్లు చీలితే ఎవరికి లాభం? నష్టపోయేది ఎవరు?

• 2014 ఎన్నికల్లో ఎంఐఎం రెండో స్థానంలో నిలిచింది

• 2018 ఎన్నికలు పూర్తిగా పోటీకి దూరంగా ఉన్నాయి

• గెలుపులో మైనార్టీ ఓటర్లదే కీలకపాత్ర

• చతుర్ముఖ పోటీ తప్పదని స్థానిక నేతల విశ్లేషణ

• మురికివాడల్లో ప్రచారం నిర్వహిస్తున్న అభ్యర్థులు

హైదరాబాద్ సిటీ, నవంబరు 6 (ఆంధ్రజ్యోతి): గ్రేటర్‌లో కీలకమైన జూబ్లీహిల్స్‌ నియోజకవర్గంలో ఈసారి పోరు చాలా ఆసక్తికరంగా మారింది. నిన్న మొన్నటి వరకు బీఆర్ఎస్, కాంగ్రెస్, బీజేపీ మధ్యే పోటీ ఉంటుందని భావించినా తాజాగా ఎంఐఎం పోటీ చేస్తుందని ప్రకటించడంతో మూడు పార్టీల అభ్యర్థులు అయోమయంలో పడ్డారు. ముస్లిం మైనార్టీ ఓట్లు చీలితే ఏ పార్టీ గెలుస్తుందోనన్న ఆందోళన వారిలో నెలకొంది.

2018 ఎన్నికల్లో పోటీకి దూరం

2009 నియోజకవర్గాల పునర్విభజన తర్వాత ఏర్పడిన జూబ్లీహిల్స్ నియోజకవర్గంలో తొలి ఎన్నికల్లో కాంగ్రెస్ అభ్యర్థి విష్ణువర్ధన్ రెడ్డి విజయం సాధించారు. సెగ్మెంట్‌లో రహమత్‌నగర్, షేక్‌పేట, యూసుఫాగూడ, బోరబండ, ఎర్రగడ్డ, వెంగల్‌రావునగర్‌ డివిజన్లు ఉన్నాయి. ఆయా డివిజన్లలో నలుగురు బీఆర్ ఎస్ కార్పొరేటర్లు, ఇద్దరు ఎంఐఎం కార్పొరేటర్లు ఉన్నారు. అయితే 2014లో జరిగిన అసెంబ్లీ ఎన్నికల్లో జూబ్లీహిల్స్‌లో ఎంఐఎం పోటీ చేసి రెండో స్థానంలో నిలిచింది. ఆ ఎన్నికల్లో టీడీపీ తరపున పోటీ చేసిన మాగంటి గోపీనాథ్ 50,898 ఓట్లు సాధించారు. ఎంఐఎం పార్టీ అభ్యర్థిగా ఎన్నికల బరిలో నిలిచిన నవీన్ యాదవ్ చివరి రౌండ్ వరకు హోరాహోరీగా పోరాడి 41,656 ఓట్లు సాధించి రెండో స్థానంలో నిలిచారు. టీడీపీ అభ్యర్థి మాగంటి గోపీనాథ్ 9,242 ఓట్లతో ఎమ్మెల్యేగా గెలుపొందారు. కాంగ్రెస్ నుంచి పోటీ చేసిన మాజీ ఎమ్మెల్యే పి.విష్ణువర్ధన్ రెడ్డి 33,642 ఓట్లతో మూడో స్థానం, టీఆర్ ఎస్ నుంచి పోటీ చేసిన జి.మురళీగౌడ్ 18,436 ఓట్లు, వైకాపా నుంచి పోటీ చేసిన వినయ్ రెడ్డి 10,528 ఓట్లు సాధించారు. కానీ 2018 ఎన్నికల్లో ఎంఐఎం ఎన్నికల్లో నిలవకపోవడంతో ఆ ఓట్లు ప్రధాన పార్టీలకు పడ్డాయి. అయితే ఈసారి ఎంఐఎం పోటీ చేస్తుండడంతో మైనారిటీ ఓట్లు ఎవరికి ఎక్కువగా పడతాయోనని స్థానికంగా చర్చ సాగుతోంది.

చతుర్ముఖ పోటీ?

2018 సార్వత్రిక ఎన్నికల్లో పోటీకి దూరంగా ఉన్న ఎంఐఎం ఇప్పుడు పోటీకి సిద్ధమైంది. మూడు పార్టీల నుంచి పోటీ చేసే అభ్యర్థుల్లో ఎవరు గెలుస్తారనేది ఆసక్తికరంగా మారింది. ఈ తరుణంలో ఎంఐఎం పార్టీ ఎన్నికల బరిలో నిలవడంతో చతుర్ముఖ పోటీ నెలకొంది. ఎంఐఎం పోటీలో ఏ పార్టీ ఓడిపోతుంది, ఏ పార్టీకి లాభిస్తుంది అనేదానిపై వాడివేడి చర్చ సాగుతోంది. నియోజకవర్గంలో మొత్తం 3,75,430 ఓట్లలో మైనార్టీ ఓట్లు 1.30 లక్షల వరకు ఉన్నాయి. దీంతో ఈ సామాజికవర్గం ఓటర్లు ఎటువైపు మొగ్గుచూపుతారోనని పార్టీలు ఆందోళన వ్యక్తం చేస్తున్నాయి. ప్రస్తుతం బీఆర్ఎస్ తరపున ఎమ్మెల్యే మాగంటి గోపీనాథ్, కాంగ్రెస్ అభ్యర్థిగా మాజీ క్రికెటర్ అజారుద్దీన్, బీజేపీ అభ్యర్థిగా లంకల దీపక్ రెడ్డి పోటీ చేస్తున్నారు. ఈ ముగ్గురికి తోడు ఎంఐఎం అభ్యర్థి కూడా రావడంతో పోటీ రసవత్తరంగా మారనుంది. గతంలో బీఆర్‌ఎస్‌, కాంగ్రెస్‌కు మద్దతుగా నిలిచిన ఓటర్లు ఈసారి ఎవరి పక్షాన నిలుస్తారనేది చర్చనీయాంశమైంది.

ఎవరికి లాభం? ఎవరికి నష్టం?

మైనార్టీ ఓట్లు చీలితే ఏ పార్టీకి లాభం? ఏ పార్టీ ఓడిపోతుందోనని నియోజకవర్గంలోని ఆ పార్టీ నేతలు చర్చించుకుంటున్నారు. గత ఎన్నికల్లో పోటీ చేయని ఎంఐఎం ఈసారి ఎన్నికల్లో పోటీ చేయనుండడంతో ప్రధాన పార్టీల్లోని ముఖ్యనేతల్లో అయోమయం నెలకొంది. వారం రోజుల క్రితం ప్రధాన పార్టీల అభ్యర్థులకు మద్దతుగా పార్టీల్లో చేరిన కొందరు మైనార్టీ నేతలు ఎంఐఎం పోటీతో మళ్లీ పార్టీలోకి వచ్చేందుకు ప్రయత్నిస్తున్నారు. 2014 ఎన్నికల్లో ఎంఐఎం పార్టీ తరఫున ఎన్నికల్లో పోటీ చేసిన నవీన్ యాదవ్‌కు టికెట్‌ కేటాయిస్తే పోటీ తీవ్రంగా ఉంటుందని పలు పార్టీల నేతలు భావిస్తున్నారు.

2014 ఎన్నికల్లో వచ్చిన ఓట్లు

పార్టీ – అభ్యర్థి – పొందిన ఓట్లు

టీడీపీ – మాగంటి గోపీనాథ్ – 50,898

ఎంఐఎం – వి. నవీన్ యాదవ్ – 41,656

కాంగ్రెస్ – పి.విష్ణువర్ధన్ రెడ్డి – 33,642

టీఆర్ ఎస్ – జి.మురళీగౌడ్ – 18,436

YSRCP – వినయ్ రెడ్డి – 10,528

2018 ఎన్నికల్లో పొందిన ఓట్లు

టీఆర్ ఎస్ – మాగంటి గోపీనాథ్ – 68,972

కాంగ్రెస్ – విష్ణువర్ధన్ రెడ్డి – 52,975

ఇండిపెండెంట్ – వి.నవీన్ యాదవ్ – 18,817

బీజేపీ – శ్రీధర్ – 8,517