న్యూఢిల్లీ: త్రిపుర, మేఘాలయ, నాగాలాండ్ శాసనసభ ఫలితాలు ఇటీవల విడుదలయ్యాయి. సార్వత్రిక ఎన్నికలకు ముందు జరిగిన ఈ ఎన్నికల్లో బీజేపీ సత్తా చాటగా.. త్రిపుర, నాగాలాండ్‌లో బీజేపీ కూటమి విజయం సాధించగా, మేఘాలయలోనూ బీజేపీ చక్రం తిప్పబోతోంది. సిఎం కాన్రాడ్ సంగ్మా పార్టీ ఎన్‌పిపి అతిపెద్ద పార్టీగా అవతరించినప్పటికీ ప్రభుత్వ ఏర్పాటుకు అవసరమైన మెజారిటీ మార్కును సాధించలేకపోయింది. దీంతో సంగ్మా ఇప్పుడు బీజేపీ వైపు చూస్తున్నారు. అన్నీ అనుకున్నట్లు జరిగితే బీజేపీతో చేతులు కలిపి ప్రభుత్వాన్ని ఏర్పాటు చేస్తానన్నారు.
బీజేపీ ఒప్పుకుంటుందా?
ఎవరూ ఊహించని ఎగ్జిట్ పోల్స్ ఫలితాలు బీజేపీకి అనుకూలంగా వచ్చాయి. మరి ఈ విజయం జాతీయ స్థాయిలో బీజేపీకి ఏ మేరకు మేలు చేస్తుందనే ప్రశ్న ఆ పార్టీ నేతల్లో నెలకొంది. నిజానికి ఈశాన్య రాష్ట్రాల్లో గెలవడం అంటే గెలుపు కాదు అనేది విశ్లేషకుల అభిప్రాయం. దీని వెనుక కూడా చాలా కారణాలున్నాయి. ఈశాన్య రాష్ట్రాల ఫలితాలు దేశ రాజకీయాలను ప్రభావితం చేయకపోవడమే ప్రధాన కారణం. జాతీయ రాజకీయాలు ప్రధానంగా ఉత్తర భారతదేశం చుట్టూ తిరుగుతున్నాయి. అందుకే ఈశాన్య రాష్ట్రాలను జాతీయ పార్టీలు పెద్దగా పట్టించుకోవడం లేదు. ఇప్పటి వరకు పట్టించుకున్న దాఖలాలు లేవు. ఇది కాకుండా, అక్కడ చాలా తక్కువ లోక్‌సభ సీట్లు ఉండటం మరో కారణం.
అయితే బీజేపీ అధికారంలోకి వచ్చిన తర్వాత పరిస్థితి మారిపోయింది. పార్టీని దేశవ్యాప్తంగా విస్తరించాలని లక్ష్యంగా పెట్టుకున్నారు. అందుకే తమిళనాడు, కర్ణాటక, కేరళలపై పార్టీ దృష్టి సారిస్తోంది. ఈ రాష్ట్రాల్లో ఎక్కువ లోక్‌సభ స్థానాలు ఉండడమే కారణం. ప్రస్తుతం కర్నాటకలో కాషాయ పార్టీ అధికారంలో ఉన్నప్పటికీ ఆశించిన స్థాయిలో బలం లేదు. అందుకే అక్కడ పార్టీని బలోపేతం చేసేందుకు పార్టీ నేతలు వ్యూహాలు రచిస్తున్నారు. తరచూ యాత్రలు చేస్తూ కార్యకర్తలు, నాయకుల్లో ఉత్సాహాన్ని నింపుతున్నారు. అలాగే తమిళనాడులో గత ఎన్నికల్లో అన్నాడీఎంకేతో కలిసి పోటీ చేసినప్పటికీ తీవ్ర నిరాశే ఎదురైంది. అలాగే కేరళలో ఆ పార్టీ పట్టు కోసం చేస్తున్న ప్రయత్నాలు కూడా విఫలమవుతున్నాయి.
మరికొద్ది నెలల్లో కర్ణాటకలో ఎన్నికలు జరగనున్నాయి. ఈ నేపథ్యంలో ఇటీవల కర్ణాటక పర్యటనకు వెళ్లిన ప్రధాని నరేంద్ర మోదీ రూ. 450 కోట్లతో విమానాశ్రయాన్ని ప్రారంభించారు. అలాగే రెండు రైల్వే ప్రాజెక్టులకు శంకుస్థాపన చేశారు. అలాగే తమిళనాడులో పార్టీ ఉనికి కోసం పాకులాడుతోంది. వచ్చే ఎన్నికల్లో కనీస సీట్లు సాధించి ప్రజల దృష్టిని తనవైపు తిప్పుకోవాలని చూస్తోంది.
అందుకే.. ఈశాన్య రాష్ట్రాల్లో విజయంతో తమ ఖాతాలో మరో రాష్ట్రం చేరిందని సంబరాలు చేసుకోవడం, బలపడుతున్నామని చెప్పుకోవడం తప్ప.. అవి బీజేపీకి మరో రకంగా ఉపయోగపడవని రాజకీయ విశ్లేషకులు తేల్చేస్తున్నారు.
