కేపీసీసీ: కేపీసీసీకి వచ్చే వారం కొత్త టీమ్ రానుంది

బెంగళూరు, (ఆంధ్రజ్యోతి): వచ్చే లోక్‌సభ ఎన్నికలను దృష్టిలో ఉంచుకుని కర్ణాటక ప్రదేశ్ కాంగ్రెస్ కమిటీకి కొత్త టీమ్ సిద్ధమవుతోంది. ఈ విషయంలో నాయకత్వమే చొరవ తీసుకుని లోక్‌సభ ఎన్నికల్లో పార్టీని విజయపథంలో నడిపించే నాయకుల అన్వేషణలో నిమగ్నమై ఉంది. కొత్త పదాధికారుల కూర్పు, మార్పులు, చేర్పులపై ఇప్పటికే ఏఐసీసీ అధ్యక్షుడు మల్లికార్జున ఖర్గే కేపీసీసీ అధ్యక్షుడు, ఉప ముఖ్యమంత్రి డీకే శివకుమార్‌తో చర్చించినట్లు తెలుస్తోంది. సెప్టెంబర్ మొదటి వారంలోగా ఈ ప్రక్రియను పూర్తి చేయాలని భావిస్తున్నట్లు కేపీసీసీ వర్గాలు వెల్లడించాయి. ప్రస్తుత వర్కింగ్ ప్రెసిడెంట్లలో నలుగురిని తొలగించి కొత్త వారికి అవకాశం కల్పించనున్నారు. అలాగే 35 మంది ఉపాధ్యక్షులు, ప్రధాన కార్యదర్శులలో సగానికి పైగా కొత్తవారికి అప్పగించనున్నారు.

20 జిల్లా కాంగ్రెస్ కమిటీలను కూడా ప్రకటించే అవకాశం ఉంది. ప్రస్తుతం కేపీసీసీ వర్కింగ్ ప్రెసిడెంట్లుగా ఉన్న సతీష్ జార్కిహోళి, ఆర్ రామలింగారెడ్డి, ఈశ్వర్ ఖండ్రే, సలీం అహ్మద్‌లను ఈ పదవుల నుంచి తప్పించనున్నట్లు సమాచారం. వారిలో మొదటి ముగ్గురు సిద్ధరామయ్య కేబినెట్‌లో మంత్రులు కాగా, సలీం అహ్మద్ విధాన పరిషత్‌లో చీఫ్ విప్‌గా క్యాబినెట్ హోదాను కలిగి ఉన్నారు. కేపీసీసీ వర్కింగ్ ప్రెసిడెంట్ పదవులను లింగాయత్, ముస్లిం, బీసీ నేతలతో భర్తీ చేసే అవకాశం ఉన్నట్లు తెలుస్తోంది. కేపీసీసీలో తమ వర్గాన్ని చేజిక్కించుకునేందుకు ముఖ్యమంత్రి సిద్ధరామయ్య వర్గం, ఉప ముఖ్యమంత్రి డీకే శివకుమార్ వర్గం తీవ్రంగా ప్రయత్నిస్తున్నట్లు తెలుస్తోంది.

నవీకరించబడిన తేదీ – 2023-08-30T11:20:19+05:30 IST