మళ్లీ అధికారంలోకి రాగానే పూర్తి స్థాయి బడ్జెట్

ఆ ఎంపీలు ఆత్మపరిశీలన చేసుకోవాలి

పార్లమెంట్‌లో గొడవ పడే వారిని ఎవరూ గుర్తుపట్టరు: మోదీ

న్యూఢిల్లీ, జనవరి 31: లోక్ సభ ఎన్నికల నేపథ్యంలో ఈసారి మధ్యంతర బడ్జెట్ ప్రవేశపెడుతున్నామని, బీజేపీ నేతృత్వంలో కొత్త ప్రభుత్వం ఏర్పడగానే పూర్తి స్థాయి బడ్జెట్ ప్రవేశపెడతామని ప్రధాని మోదీ తెలిపారు. తద్వారా వచ్చే లోక్‌సభ ఎన్నికల్లో విజయం తమదేనని ధీమా వ్యక్తం చేశారు. పార్లమెంటు కార్యకలాపాలను తరచూ అడ్డుకునే ఎంపీలు ఆత్మపరిశీలన చేసుకోవాలని మోదీ సూచించారు. పార్లమెంట్‌ను ఇబ్బంది పెట్టే, అంతరాయం కలిగించే ఎంపీలను సొంత నియోజకవర్గాల ప్రజలు గుర్తుపెట్టుకోరు. బుధవారం పార్లమెంట్ బడ్జెట్ సమావేశాల సందర్భంగా మోదీ మీడియాతో మాట్లాడారు. జర్నలిస్టులకు రామ్‌ రామ్‌ అంటూ అభివాదం చేశారు. గత పార్లమెంట్ సమావేశాల్లో సమావేశాలకు అంతరాయం కలిగించినందుకు గానూ ఉభయ సభల్లో రికార్డు స్థాయిలో 146 మంది ఎంపీలను సస్పెండ్ చేసిన సంగతి తెలిసిందే. వారిని టార్గెట్ చేస్తూ మోడీ వ్యాఖ్యలు చేశారు. ప్రజాస్వామ్య విలువలను అవమానిస్తున్నారని విమర్శించారు. మోదీ విమర్శలపై కాంగ్రెస్‌ అధ్యక్షుడు ఖర్గే ఓ ప్రకటనలో ఘాటుగా స్పందించారు. మోదీ ప్రభుత్వం పార్లమెంటరీ ప్రజాస్వామ్యాన్ని నిర్వీర్యం చేసి నిరంకుశ ధోరణిలో వ్యవహరిస్తోందని విమర్శించారు. గత సమావేశాల్లో 146 మంది విపక్ష ఎంపీలను సస్పెండ్ చేసిన ప్రభుత్వం కేవలం మూడు రోజుల్లోనే 14 బిల్లులను ఆమోదించిందని గుర్తు చేశారు. డిప్యూటీ స్పీకర్ పదవిని విపక్షాలకు కేటాయించడం ఆనవాయితీ అని, అయితే ప్రస్తుత లోక్ సభ ఐదేళ్ల పదవీకాలం డిప్యూటీ స్పీకర్ లేకుండానే ముగుస్తోందని, ఇది మోదీ నిరంకుశత్వానికి నిదర్శనమన్నారు.

నవీకరించబడిన తేదీ – ఫిబ్రవరి 01, 2024 | 02:54 AM