దేశ రాజధానిలో నెల రోజుల పాటు సెక్షన్ 144
నేడు రైతుల “ఛలో ఢిల్లీ” నేపథ్యంలో ఆంక్షలు
నగరంలోకి ట్రాక్టర్లు, ట్రక్కుల ప్రవేశంపై నిషేధం
న్యూఢిల్లీ, ఫిబ్రవరి 12 (ఆంధ్రజ్యోతి): రోడ్లపై ఇసుక బస్తాలు.. ముళ్ల కంచెలు, కాంక్రీట్ దిమ్మలు.. అల్లర్లను నిరోధించే బలగాలు.. ఎక్కడికక్కడ సరిహద్దులు మూసివేత.. డ్రోన్లతో నిఘా.. జనం గుమికూడేందుకు ఆంక్షలు..! ఇదీ దేశ రాజధాని ఢిల్లీలో ప్రస్తుత పరిస్థితి. అన్ని పంటలకు కనీస మద్దతు ధర, రుణమాఫీ, పింఛన్లు తదితర డిమాండ్లకు హామీ ఇచ్చే చట్టం తేవాలని డిమాండ్ చేస్తూ రైతు సంఘాలు పార్లమెంట్ను ముట్టడించేందుకు ‘చలో ఢిల్లీ’ కార్యక్రమం చేపట్టడంతో పోలీసులు, భద్రతా బలగాలు అప్రమత్తమయ్యాయి. అష్టా నగరాన్ని దిగ్బంధించారు. దేశ రాజధానిలో నెల రోజుల పాటు 114 సెక్షన్ను అమలు చేయాలని సోమవారం ఉత్తర్వులు జారీ చేసింది. యూపీ, పంజాబ్, హర్యానా సరిహద్దుల్లోని జాతీయ రహదారులను పూర్తిగా మూసివేశారు. మూడేళ్ల కిందటే రైతుల ఆందోళనకు కేంద్రంగా మారిన సింఘా, ఘాజీపూర్, తిక్రీలో బారికేడ్ల ఏర్పాటుతో పాటు భారీగా బలగాలను మోహరించారు. వాహనాలు ముందుకు వెళితే టైర్లు పంక్చర్ అవుతాయని రోడ్లపై మేకులు వేశారు. ఘజియాబాద్ తో పాటు రోడ్లపై సిమెంట్ దిమ్మెలను అడ్డంగా వేసి వాటి మధ్య కాంక్రీట్ మిశ్రమాన్ని నింపారు. సెక్షన్ 144 నేపథ్యంలో బహిరంగ సభలు నిర్వహించడం, ట్రాక్టర్లు, ట్రక్కులు, ట్రాలీల రాకపోకలపై నిషేధం విధించినట్లు ఢిల్లీ పోలీస్ కమిషనర్ సంజయ్ అరోరా తెలిపారు. లైసెన్స్డ్ గన్లు, మండే పదార్థాలు, కత్తులు, త్రిశూలాలు, రాడ్లు, చీపుర్లు వెంట తీసుకురాకూడదని తెలిపారు. లౌడ్ స్పీకర్లపై కూడా ఆంక్షలు వర్తిస్తాయి. అత్యవసరమైతే తప్ప ప్రజలు ప్రధాన రహదారులపైకి రావద్దని సూచించారు. రైతుల ఆందోళనల నేపథ్యంలో రాష్ట్రాలు కూడా చర్యలు చేపట్టాయి. హర్యానా అంబాలా వద్ద పంజాబ్తో సరిహద్దును మూసివేసింది. కాగా, పంజాబ్ నుంచి ఇప్పటికే ట్రాక్టర్లు ఢిల్లీకి బయలుదేరాయి.
2,500 ట్రాక్టర్లు.. 20 వేల మంది రైతులు
వ్యవసాయోత్పత్తులకు మద్దతు ధరలకు చట్టబద్ధత కల్పించాలని, లఖింపూర్లో రైతులపై జరిగిన మారణకాండలో నిందితులను శిక్షించాలని, నకిలీ ఎరువులు, విత్తనాల తయారీదారులపై కఠిన చర్యలు, ఉపాధి హామీని వ్యవసాయానికి అనుసంధానం చేయాలని రైతులు డిమాండ్ చేస్తున్నారు. మంగళవారం చలో ఢిల్లీతో పాటు 16న గ్రామీణ భారత్ బంద్కు పిలుపునిచ్చారు. వివిధ రాష్ట్రాల నుంచి 20 వేల మంది రైతులు 2,500 ట్రాక్టర్లలో చలో ఢిల్లీకి రావచ్చని ఇంటెలిజెన్స్ వర్గాలు అంచనా వేస్తున్నాయి. రైతు సంఘాలు కూడా 40 సార్లు సిద్ధమయ్యాయని పేర్కొన్నారు. దక్షిణాది రాష్ట్రాల రైతులు కూడా ఢిల్లీ చేరుకోవచ్చని భావిస్తున్నారు.
అరెస్టులపై ఆగ్రహం వ్యక్తం చేశారు
ఆలిండియా ప్రజాస్వామ్య మహిళా సంఘం, భూమి అధికార్ ఆందోళన్ కిసాన్ సంఘర్ష్ సమితి, బికెయు (టికాయత్) నాయకులను మధ్యప్రదేశ్ పోలీసులు అరెస్టు చేయడాన్ని అఖిల భారత కిసాన్ సభ (ఎఐకెఎస్) తీవ్రంగా ఖండించింది. కాగా, రైతు ప్రతినిధులతో పీయూష్ గోయల్, అర్జున్ ముండా, నిత్యానందరాయ్ సహా కేంద్ర మంత్రుల బృందం చర్చలు జరపనుంది.
నవీకరించబడిన తేదీ – ఫిబ్రవరి 13, 2024 | 04:06 AM
